Minuła 4 dni, jak KDB zabraŭ vydaŭca Źmitra Kołasa. Źviazana sa spravaj pra Mačuliščy?
Infarmacyja, što Źmicier Kołas zatrymany, źjaviłasia 5 sakavika. Ci vystaŭlenaje jamu abvinavačvańnie, nieviadoma. Raniej zatrymańnie źviazvali z vydavieckaj dziejnaściu, paśla źjaviłasia mierkavańni pra suviaź z padziejami vakoł dyviersii ŭ Mačuliščach.
09.03.2023 / 18:02
Źmicier Kołas. Fota: pushlib.org.by
Znajomyja Źmitra Kołasa raskazali «Našaj Nivie», što vydaviec na svabodu jašče nie vyjšaŭ. 5 sakavika ŭ jaho kvatery adbyŭsia pieratrus, a paśla jaho zakančeńnia haspadara zabrali. Zhodna z zakanadaŭstvam, abvinavačvańnie pavinna być vystaŭlenaje na praciahu troch dzion paśla zatrymańnia. Nieviadoma, ci trapiŭ da aryštavanaha advakat. Pavodle zakanadaŭstva, abvinavačvańnie vystaŭlajecca ŭ prysutnaści abaroncy ci zakonnaha pradstaŭnika źniavolenaha.
U toj ža dzień, 5 sakavika, vydaviectva «Źmicier Kołas» u sacyjalnych sietkach paviedamiła ab prypynieńni dziejnaści, a krynica z knižnych kołaŭ pacvierdziła, što Kołas i jaho drukar — u Kamitecie dziaržaŭnaj biaśpieki.
Z 5 sakavika źviestak pra los Źmitra Kołasa niama. Jaho zatrymańnie nie było pacvierdžanaje praŭładnymi miedyja ci telehram-kanałami siłavikoŭ.
Nieviadoma, što Kołasu inkryminujecca. Mahčyma, jaho zabrali, bo drukar ź jahonaha vydaviectva byŭ zatrymany pa spravie ab dyviersii suprać rasijskaha samalota-navodčyka ŭ Mačuliščach. Proźvišča drukara — Aleh Syčoŭ. Ułady zajavili, što hramadzianin Ukrainy Mikałaj Šviec, jakoha łukašysty abvinavacili ŭ datyčnaści da dyviersii, byŭ zatrymany ŭ domie Aleha Syčova ŭ vioscy Čarciaž Baraŭlanskaha sielsavieta.
Pakul hetaj infarmacyi nie było, znajomyja Kołasa mierkavali, što nahodaj dla zatrymańnia moh stać zbornik «Vyzvalenyja i zaniavolenyja. Polska-biełaruskaje pamiežža 1939—1941 hadoŭ u dakumientach biełaruskich archivaŭ». Jon zjaviŭsia ŭ śpisie ekstremisckich materyjałaŭ 17 studzienia 2023 hoda pa rašeńni suda Centralnaha rajona Minska. Jaho pryznańnie ekstremisckim — častka šyrokaj kampanii łukašystaŭ pa pierapisvańni historyi.
66-hadovy Źmicier Kołas, syn litaraturnaha krytyka Hieorhija Kołasa i brat kinarežysiora i piedahoha Uładzimira Kołasa, zrabiŭ sabie imia jašče ŭ 1980-ja pierakładami z francuzskaj movy na biełaruskuju. Z 1990-ch Kołas zajmajecca vydavieckaj spravaj.
Vydaviectva «Źmicier Kołas» viadomaje knihami suśvietnaj paezii, prozy, dramaturhii ŭ najlepšych biełaruskich pierakładach.
Šyrokaje pryznańnie atrymała knižnaja sieryja vydaviectva «Paety płaniety». U cykle vyjšła 100 vieršavanych zbornikaŭ najvydatniejšych paetaŭ śvietu — u pryvatnaści, Hijoma Apalinera, Uiljama Błejka, Hienrycha Hajne, Hieorha Hajma dy inšych, — u pierakładzie na biełaruskuju movu.
Akurat 28 lutaha prajšła prezientacyja 100-ha vypusku sieryi.
Čytajcie taksama:
Vydaviectva «Źmicier Kołas» časova prypyniaje svaju dziejnaść. Jość źviestki, što Źmicier Kołas — u KDB