Борыс Джонсан: У кантэксце таго, што адбываецца ва Украіне, мы павінны памятаць і пра Беларусь
Святлана Ціханоўская сёння пачала свой візіт у Лондан, дзе сустрэлася з былым прэм'ер-міністрам Вялікабрытаніі Борысам Джонсанам, паведамляе прэс-служба Ціханоўскай.
07.03.2023 / 20:32
Джонсан — Ціханоўскай: «Мы сапраўды захапляемся адвагай беларускіх ваяроў»
Як паведамляецца, бакі абмеркавалі сітуацыю ўнутры краіны і нядаўнюю мужную акцыю беларускіх партызанаў па пашкоджанні самалёта А-50 у Мачулішчах. Ціханоўская адзначыла, што гэта паказала неабароненасць і слабасць рэжыму.
Ціханоўская і Джонсан абмеркавалі дапамогу для беларускіх добраахвотнікаў ва Украіне. Святлана Ціханоўская заклікала Борыса Джонсана трымаць Беларусь у міжнародным парадку дня і ўзяць патранаж над адным з палітвязняў.
«Мы сустрэліся, каб абмеркаваць вельмі важную задачу.
У кантэксце таго, што адбываецца ва Украіне, мы павінны памятаць і пра Беларусь.
У прыватнасці, трэба адзначыць адвагу і гераічнасць беларускіх ваяроў за свабоду, якія змагаюцца за яе ва Украіне і ўдзельнічаюць у вызваленні краіны ад войска Пуціна.
Мы сапраўды захапляемся адвагай беларускіх ваяроў.
Святлана, быў рады нашай сустрэчы», — заявіў па выніках сустрэчы Джонсан.