Paśla admieny kancerta «Lapisa Trubiackoha» ŭ Sierbii jaho admianili i ŭ Čarnahoryi
U Budvie, kurortnym horadzie na ŭźbiarežžy Čarnahoryi, 14 lutaha admianili kancert «Lapisa Trubiackoha». Heta adbyłosia paśla taho, jak za niekalki hadzin da vystupu pierad kłubam sabraŭsia natoŭp ludziej, jaki skandavaŭ: «Sierby i ruskija — braty navieki», — paviedamlaje «Zierkało» sa spasyłkaj na miascovaje vydańnie CDM.
15.02.2023 / 18:56
Sam kłub admienu kancerta nie kamientavaŭ, jak i pradstaŭniki «Lapisa Trubiackoha». Ale na vystupleńnie pierad kancertam adreahavali ŭ pasolstvie Ukrainy ŭ Čarnahoryi. Tam zajavili, što heta moža być patłumačana jak «pramaja pahroza ŭkraincam u Budvie».
«Zaklikajem ułady Čarnahoryi terminova adreahavać na hety incydent i zrabić usio dla zabieśpiačeńnia biaśpieki ŭkraincaŭ, jakija žyvuć u Čarnahoryi», — padkreślili ŭ pasolstvie Ukrainy.
Siońnia ŭviečary, 15 lutaha, pavinien byŭ adbycca kancert «Lapisa Trubiackoha» ŭ inšym čarnahorskim horadzie — Kotary. Jaho tudy pieranieśli z Budvy. Ale niadaŭna źjaviłasia paviedamleńnie, što jon taksama admienieny, tym, chto nabyŭ kvitki, viernuć hrošy.
Raniej kancert «Lapisa Trubiackoha» admianili ŭ Białhradzie, stalicy Sierbii. Pa słovach arhanizataraŭ, heta adbyłosia z-za drennaha samaadčuvańnia Siarhieja Michałka, ale bolš imaviernaj padajecca palityčnaja viersija.