Vynieśli prysud dyrektaram «Mahateksa», jakich abvinavačvali ŭ prypiskach i niezakonnych premijach
27 studzienia 2023 hoda sud Leninskaha rajona h. Mahilova razhledzieŭ kryminalnuju spravu ŭ dačynieńni da kiraŭnikoŭ «Mahateksa», jakich abvinavačvali ŭ pieravyšeńni słužbovych paŭnamoctvaŭ i słužbovaj padrobcy z metaj skažeńnia źviestak dziaržaŭnaj statystyčnaj spravazdačnaści.
02.02.2023 / 10:18
Pavodle abvinavačańnia, kiraŭniki vytvorčaści AAT «Mahateks» ź listapada 2020 hoda pa červień 2021 hoda naŭmysna, z metaj utojvańnia vynikaŭ dziejnaści pradpryjemstva pisali niesapraŭdnyja danyja ab vykanańni fabrykaj płana vypusku pradukcyi, takim čynam na fabrycy atrymlivali premii.
U vyniku AAT «Mahateks», ličyć abvinavačańnie, naniesienaja škoda ŭ asabliva bujnym pamiery na ahulnuju sumu 32225,39 rubla, a taksama była «istotnaja škoda dziaržaŭnym i hramadskim intaresam».
Sud pryznaŭ abodvuch dyrektaraŭ vinavatymi ŭ pieravyšeńni słužbovych paŭnamoctvaŭ, što pryviało da ciažkich nastupstvaŭ (č. 3 art. 426 KK). Ich pryhavaryli da troch hadoŭ pazbaŭleńnia voli z adterminoŭkaj na dva hady i štrafu ŭ 300 bazavych vieličyń (11 100 rubloŭ), a taksama pazbavili prava zajmać kiraŭničyja i administracyjnyja pasady na piać hadoŭ.
Pa druhim artykule abvinavačańnia «Słužbovaja padrobka, ździejśnienaja z metaj skažeńnia źviestak dziaržaŭnaj statystyčnaj spravazdačnaści» (č. 2 art. 427 KK) — padsudnych apraŭdali.