Самага пажылога «тэрарыста» Беларусі будуць ізноў судзіць
70-гадовага пенсіянера з Нясвіжа Васіля Дземідовіча, асуджанага да 6 гадоў калоніі, будуць судзіць па новай крымінальнай справе, паведамляе «Вясна».
30.01.2023 / 11:06
Васіль Дземідовіч. Фота: сацсеткі
Суд Ленінскага раёна Гродна асудзіў Дземідовіча 1 верасня 2022 года. Яго абвінавацілі ў абразах прадстаўніка ўлады, суддзі, Лукашэнкі і арганізацыі масавых беспарадкаў. Апроч калоніі, мужчыну далі штраф у памеры 50 базавых велічынь (1600 рублёў). Таксама з яго пастанавілі спагнаць маральную кампенсацыю пацярпелым ў суме 32 000 рублёў.
Заўтра, 31 студзеня, у Дзяржынску адбудзецца чарговы суд над пенсіянерам. Гэтым разам яго абвінавачваюць паводле арт. 369 КК (абраза прадстаўніка ўлады). Справу будзе разглядаць суддзя Раман Крыловіч.
Пра Дземідовіча стала вядома выпадкова са спісаў КДБ. Ён самы пажылы беларус, уключаны ў спіс «тэрарыстаў».