У Афганістане прэзентавалі першы нацыянальны суперкар ФОТА
Над яго стварэннем працавалі пяць год, і ён мае рухавік ад «Таёты Карола».
12.01.2023 / 15:39
Афганскія распрацоўшчыкі прэзентавалі прататып свайго першага суперкара Mada 9, паведамляе нацыянальны тэлеканал ToloNews. Над стварэннем аўтамабіля пяць гадоў працавалі 30 інжынераў з Кабульскага прафесійна-тэхнічнага інстытута.
Прадстаўнік талібаў Забіула Муджахід размясціў у твітары фота аўтамабіля, заявіў, што распрацоўка ёсць гонарам для яго краіны, і падзякаваў за арганізацыю работ па ёй Міністэрству прафесійнай адукацыі.
Тэхнічныя характарыстыкі Mada 9 пакуль не выдаюцца. Як адзначае Daily Mail, на дадзены момант вядома, што ў суперкары ўстаноўлены мадыфікаваны рухавік Toyota Corolla, здольны вытрымліваць павелічэнне хуткасці.
Таксама ў планах вытворцы абсталяваць аўтамабіль электрычнай трансмісіяй.
Кузаў Mada 9 выраблены з лёгкіх кампазітных матэрыялаў, а сілавы агрэгат размешчаны пад кіроўцам. Акрамя гэтага, ёсць верагоднасць, што суперкар часткова атрымае характарыстыкі ўседарожніка. У выданні гэта звязваюць з тым, што аўтамабіль адаптаваны пад ўзгорысты ландшафт Афганістана.
Вытворца дадаў, што Mada 9 хутка паставяць на тэсты для ацэнкі хадавых якасцяў. Першапачаткова кампанія мае намер выпусціць аўтамабіль на ўнутраным рынку, аднак не адмаўляе, што ў будучыні пачне экспартаваць Mada 9 на міжнародныя пляцоўкі, а таксама прымаць удзел у сусветных выставах і аўтасалонах.