Urad Rasii ŭchvaliŭ pahadnieńnie ab uzajemnym pryznańni viz ź Biełaruśsiu
Pahadnieńnie praduhledžvaje, što inšaziemcy zmohuć pierasiakać «niabačnuju» naziemnuju miažu Rasii i Biełarusi, a taksama ŭzmocnicca abmien infarmacyjaj pamiž krainami ab vydadzienych i anulavanych dazvołach na ŭjezd.
29.12.2022 / 16:59
Fota ilustracyjnaje
Urad Rasii ŭnios na ratyfikacyju ŭ Dziarždumu pahadnieńnie ź Biełaruśsiu ab uzajemnym pryznańni viz, jak vynikaje z dakumienta, apublikavanaha ŭ dumskaj elektronnaj bazie.
Baki ŭzajemna pryznajuć vizy i inšyja dakumienty, jakija dajuć prava na ŭjezd i znachodžańnie na terytoryi Biełarusi i Rasii, a taksama adznaki ab pierasiačeńni źniešniaj miažy Sajuznaj dziaržavy.
U tłumačalnych dakumientach śćviardžajecca, što metaj pahadnieńnia stała «stvareńnie pravavoj bazy dla ŭrehulavańnia paradku pierasiačeńnia zamiežnymi hramadzianami i asobami biez hramadzianstva rasijska-biełaruskaj miažy».
«U ramkach realizacyi pahadnieńnia budzie stvoranaja sistema infarmacyjnaha abmienu ź biełaruskim bokam ab vydadzienych i anulavanych dazvołach na ŭjezd i znachodžańnie, a taksama pierasiačeńni miežaŭ Rasii i Biełarusi ŭ punktach propusku», — udakładniajecca ŭ supravadžalnych materyjałach.
Heta pahadnieńnie było padpisana ŭ Minsku jašče 19 červienia 2020 hoda, i tolki ciapier baki pavolna viaduć praces pa jaho ŭzhadnieńni i zaćviardžeńni.
Ciapier pierasiakać miažu Biełarusi i Rasii pa-za punktami propusku mohuć tolki hramadzianie hetych dźviuch krain i ludzi, u jakich jość tam dazvoł na žycharstva. Inšaziemcam ža, niahledziačy na farmalnuju «adkrytaść rubiažoŭ», tak rabić nielha. Praz heta pieryjadyčna ŭźnikali nieparazumieńni i navat skandały.