U Rasii mohuć stvaryć palavyja haŭptvachty
Prajekt ukaza prezidenta Rasii ab stvareńni palavych haŭptvachtaŭ raspracavany Ministerstvam abarony RF i apublikavany.
29.12.2022 / 15:16
Kali taki ŭkaz budzie padpisany, vajskoŭcy atrymajuć zakonnuju mahčymaść karać tych, chto ździejśniŭ pravinnaści. Takija sałdaty mohuć być izalavanyja ŭ śpiecyjalnyja pamiaškańni, jakija pa ŭmovach pavinny być nie horšyja, čym u astatnich vajskoŭcaŭ.
Haŭptvachty budzie zabaroniena abstalavać u sutareńniach, padvalnych pamiaškańniach, jakija nie majuć voknaŭ i adpaviednaj vientylacyi, roznych jomistaściach, jamach, — «za vyklučeńniem vypadkaŭ, abumoŭlenych zachavańniem žyćcia vajskoŭcaŭ», havorycca ŭ prajekcie ŭkaza.
Z pačatku vajny i paśla abviaščeńnia mabilizacyi ŚMI šmat razoŭ raspaviadali, što sałdat, jakija admaŭlajucca brać udzieł u bajavych dziejańniach, izalavali, trymali va ŭmovach, blizkich da turemnych, źbivali i katavali.