«Рэч не ў грамадзянстве, а ў паводзінах кліента». Bank of Georgia даў афіцыйны каментар адносна закрыцця рахункаў беларусаў і расіян
23 снежня ў сеціве сталі з'яўляцца паведамленні аб блакаванні і прымусовым закрыцці рахункаў грамадзян Беларусі і Расіі ў адным з найбуйнейшых камерцыйных банкаў Грузіі Bank of Georgia. Пакуль банк не даваў афіцыйных тлумачэнняў, карыстальнікі схіляліся да версіі блакавання гэтых рахункаў з-за аперацый з крыптавалютамі. Сёння з'явіўся і афіцыйны каментар банка.
28.12.2022 / 23:19
Арыгінальны будынак цэнтральнага офіса Bank of Georgia ў Тбілісі
У афіцыйным каментары Bank of Georgia растлумачыў, што рашэнне аб закрыцці рахункаў звязана з незвычайнымі паводзінамі кліентаў, а не з іх грамадзянствам.
«Мы хацелі б падкрэсліць, што рашэнне не заснавана на грамадзянстве, яно звязана з незвычайнай або рызыкоўнай дзейнасцю / паводзінамі кліента. У прыватнасці, калі ўліковы запіс выкарыстоўваецца для транзітных мэтаў або з'яўляецца неактыўным уліковым запісам».
У банку таксама тлумачаць, што Закон аб камерцыйных банках Грузіі дазваляе адмаўляць кліентам у адкрыцці рахункаў, іх абслугоўванні або закрываць рахункі без тлумачэння прычын. Гэта рашэнне прымаецца на падставе ўнутранай палітыкі банка і грунтуецца на такіх параметрах, як класіфікацыя краін з высокім узроўнем рызыкі, спадарожная рызыка і іншае.
Пры гэтым тое, што сярод тых, чые банкаўскія рахункі былі закрытыя банкам, аказалася надта шмат беларусаў, не пацвярджаецца.