Supracoŭnikaŭ Nacyjanalnaha mastackaha muzieja zvolnili za fotakartku salidarnaści 2020 hoda
Vydańniu Reform.by na asnovie infarmacyi z roznych krynic ŭdałosia pacvierdzić, što na dadzieny momant z muzieja dakładna zvalniajuć 11 čałaviek. Zvalnieńnie jašče adnoj supracoŭnicy abmiarkoŭvajecca.
26.12.2022 / 17:15
Na dadzieny momant Reform.by pacvierdzili zvalnieńni:
zahadčycy redakcyjna-vydavieckaha addzieła Śviatłany Šukan, zahadčycy vystavačnaha addzieła muzieja Jaŭhienii Sabaleŭskaj, zahadčycy addzieła biełaruskaha mastactva XX-XXI stahoddziaŭ Kaciaryny Izafatavaj, restaŭrataraŭ Śviatłany Dzikuć i Alaksandra Łahunovič-Čarapko, hałoŭnaha zachavalnika Taćciany Martul, namieśnika hiendyrektara ŭ pytańniach restaŭracyi Siarhieja Viečara. Ich zajavy pa pahadnieńni bakoŭ byli padpisany 23 śniežnia.
Padstavaj dla čystak stała fatahrafija salidarnaści častki kalektyvu muzieja, zroblenaja ŭ 2020 hodzie. Na joj muziejnyja śpiecyjalisty stajać na prystupkach Nacyjanalnaha mastackaha muzieja z płakatami suprać hvałtu i kvietkami.
17 śniežnia «vykryvalny» zdymak byŭ raźmieščany ŭ adnym z prapahandysckich telehram-kanałaŭ — a dalej pajšła ataka na supracoŭnikaŭ muzieja. U pryvatnaści, stali palivać brudam kiraŭnicu addzieła biełaruskaha mastactva XX-XXI stahoddziaŭ, mastactvaznaŭcu, kuratarku Kaciarynu Izafatavu, «vykryŭšy» jaje dačynieńnie da karupcyi. Potym prajšlisia pa namieśnikach dyrektara kulturnaj ustanovy, daśviedčanych śpiecyjalistach — Śviatłanie Aniejka i Siarhieju Viečaru.
U vyniku byŭ razdźmuty vialiki skandał, paśla čaho z muzieja stali zvalniać ludziej, vyjaŭlenych na zdymku. «Karupcyja» supracoŭnikaŭ muzieja, pa śćviardžeńniach prapahandystaŭ, — nibyta ŭ tym, što ŭ 2021 hodzie muziej kupiŭ u mastaka Uładzimira Carykoviča, muža mastactvaznaŭcy Kaciaryny Izafatavaj, karcinu «Kryk» (2020). Choć jaje kuplali pa ŭsich praviłach i pracedurach.
Možna mierkavać, što kolkaść zvolnienych moža vyraści, u papiarednich paviedamleńniach pra heta ŭžo išła havorka pra 18 čałaviek.