U ZŠA lutyja marazy. Bolš za 20 čałaviek zahinuli, paŭtara miljona žycharoŭ apynulisia bieź śviatła
Mahutny zimovy štorm, jaki prynios mocny maroz i vialikija apadki, achapiŭ bolšuju častku terytoryi ZŠA, na jakoj pražyvaje kala 250 młn čałaviek, heta amal dźvie traciny nasielnictva krainy, piša Bi-bi-si.
25.12.2022 / 13:04
Papiaredžańni ab ekstremalnych umovach nadvorja dziejničajuć u 12 štatach ZŠA.
Na śviežaj mapie Nacyjanalnaha ŭpraŭleńnia akijaničnych i atmaśfiernych daśledavańniaŭ (NOAA) bačna, jak zamiało Amieryku napiaredadni Kaladaŭ.
Vyjava NOAA dla AP
Mocnyja marazy, škvalisty viecier i mahutnyja śniehapady stali pryčynaj hibieli 23 čałaviek. Bolš za paŭtara miljona žycharoŭ krainy zastalisia biez elektryčnaści.
Mahutny zimovy štorm achapiŭ terytoryju ŭ 3200 km — ad Techasa da Kviebieka. «Vybuchny cykłon» prynios mocnyja zaviei na miažu ZŠA i Kanady, u rajon Vialikich azior. Značnaja terytoryja Kanady taksama apynułasia pad uładaj zimovaha štormu.
Nacyjanalnaja mietearałahičnaja słužba ZŠA kanstatuje, što heta pieršaje nastolki maštabnaje nastupleńnie chaładoŭ za ŭsiu historyju nazirańniaŭ.
Tempieratura pavietra ŭ štacie Mantana ŭ piatnicu apuskałasia da minus 45 hradusaŭ. U Mičyhanie ŭ piatničnuju noč tempieratura apuściłasia da minus 17 hradusaŭ.
Mahutnyja śniehapady prahnazujucca ŭ Piensilvanii.
U Sietle i Portlendzie žychary koŭzajucca pa ledzianoj hłazury, jakaja pakryła vulicy haradoŭ.
Siarod achviar zimovaha štormu — zahinułyja ŭ DTZ ludzi. Situacyja na darohach značna ŭskładniłasia. Tak, u štacie Ahajo sutyknulisia adrazu 50 mašyn, achviarami bujnoha DTZ stali čatyry matacyklisty.
Amal 6000 avijarejsaŭ byli skasavanyja ŭ piatnicu ŭ ZŠA, śviedčać źviestki sajta FlightAware. Taksama viadoma ab admienie 1200 avijarejsaŭ u subotu.
Hetaje Rastvo moža stać samym chałodnym u ZŠA za apošnija try dziesiacihoddzi, ličać sinoptyki.