Ksiondz Viačasłaŭ Barok patłumačyŭ, čamu jon bolš nie vystupaje
Viadomamu katalickamu śviataru Viačasłavu Barku, a adnačasova aktyŭnamu błohieru, zabaraniła vykazvacca na hramadska značnyja temy ŭ ŚMI i sacsietkach carkoŭnaje načalstva, patłumačyŭ jon u telehram-kanale.
23.12.2022 / 23:55
Prosiačy prabačeńnia pierad tymi, chto pryzvyčaiŭsia jaho čytać i słuchać, śviatar tłumačyć:
«Sprava ŭ tym, što 11 listapada 2022 hoda ja byŭ aznajomleny z rašeńniem majho ardynaryja biskupa Aleha Butkieviča, jakoje było pryniataje 28 kastryčnika 2022 hoda, zhodna ź jakim ja atrymaŭ kananičnuju vymovu i mnie, pad pahrozaj pazbaŭleńnia mahčymaści vykonvać usie śviatarskija abaviazki, było zabaroniena publična vykazvacca ŭ ŚMI, i ŭ tym liku ŭ sacyjalnych sietkach.
Biskup śćvierdziŭ, što ja «šmat uvahi pryśviačaju palityčnaj situacyi ŭ Biełarusi i śviecie», a maje «vykazvańni vyklikajuć zharšeńnie siarod viernikaŭ i spryjajuć ich raździaleńniu i ŭzajemnaj varožaści».
Barok padparadkavaŭsia, ale padkreślivaje, što sustreŭ hetaje rašeńnie biez razumieńnia.
«Ciaham apošniaha miesiaca ja sprabavaŭ znajści parazumieńnie sa svaim biskupam. Imknuŭsia patłumačyć, što adzinaja meta ŭsich maich vykazvańniaŭ — heta prapaviedavańnie Jevanhiella i abviaščeńnie aficyjnaha vučeńnia Kaścioła, što, biezumoŭna, ja staraŭsia rabić u duchu lubovi da Biełarusi».
Śviatar upeŭnieny, što jaho niapravilna zrazumieli:
«Tamu što ŭ maim prapaviedavańni Słova Božaha zaŭsiody ŭ centry jość Chrystos i maja meta — pryciahnuć uvahu da kryzisnych sacyjalnych prablem, a nie da palityčnaj situacyi.
Ja nikoli nie vystupaŭ pa linii nivodnaj palityčnaj partyi, nie afišavaŭ palitykaŭ i nie vioŭ palityčnaj dziejnaści. Mianie mienš chvaluje palityčnaja situacyja, ale bolš cikavić Vaładarstva Božaje, jakoje moža być pabudavana tolki na praŭdzie i spraviadlivaści».
Metaj Barka, jak jon śćviardžaje, nikoli nie było siejańnie «zharšeńnia, padziełu i varožaści», jon imknuŭsia tolki da «abjadnańnia ludziej vakoł praŭdy Chrysta».
«Ja dumaŭ, što rablu heta paśpiachova, bo pałova maich padpisčykaŭ na YouTube — pravasłaŭnyja, pratestanty i ateisty. Ja nikoha nikoli nie adkidvaŭ i nieadnarazova zaklikaŭ słuchačoŭ da dyjałohu ŭ raskołatym siońnia biełaruskim hramadstvie.
Akramia taho, mnohija z maich raźmieščanych materyjałaŭ u sacyjalnych sietkach (kala 10) u 2021 hodzie prajšli dziaržaŭnuju linhvistyčnuju ekśpiertyzu, pavodle jakoj nie było vyjaŭlena źmiestu, jaki śviedčyć pra toje, što ja siejaŭ raskoł i varožaść».
Viačasłaŭ Barok paprasiŭ biskupa nazvać kankretnyja pamyłki, jakija jon zrabiŭ, ale adkazu na svaje pytańni dahetul nie atrymaŭ. Ale:
«Choć ja nie razumieju, za što mianie pakarali, ja padparadkoŭvajusia rašeńniu biskupa. I ja praciahvaju maŭčańnie ŭ ŚMI i sacyjalnych sietkach», — zaviaršaje jon.
Čytajcie taksama:
Ci ŭsiakaja ŭłada ad Boha? Tłumačyć śviatar
«Zło — nie zajmacca seksam». Ksiondz Viačasłaŭ Barok adkazaŭ na pytańni, jakija vy saromielisia zadać