Фядута прыбыў у калонію, дзе «павышае кваліфікацыю»
Жонка філолага-палітвязня Аляксандра Фядуты падзялілася ў фэйсбуку вестачкай пра мужа, якога нядаўна этапавалі ў магілёўскую калонію №15 для адбыцця «драконаўскага» 10-гадовага пакарання.
16.12.2022 / 00:02
«Пакуль, да 20 снежня, у «каранціне», потым размяркуюць у атрад. Піша, што першае знаёмства з новым месцам жыхарства прайшло нармальна, атрымаў казённую форму, якая дастаткова прымальная, нават кажан (куртка, мабыць) цёплы і зручны, а чаравікі ўзяў на памер большыя, каб падчас прыступу падагры ўлазілі ногі. Ну, нечаму навучыўся ўжо.
Не магла сабе ўявіць у кепскім сне — АІФ на зоне, але вось так, будзе павышаць кваліфікацыю. Усім прывітанне і пажаданне здароўя», — з горкай іроніяй напісала жонка палітвязня.