Сакратар Рады бяспекі Украіны: Для нас «раптоўная» праверка войскаў у Беларусі не была нечаканасцю
Украіна загадзя ведала, што сёння, 13 снежня, у войсках Беларусі пройдзе праверка боегатоўнасці. УСУ гатовыя да любых варыянтаў развіцця падзей на гэтым кірунку і не раяць нікому сунуцца на тэрыторыю Украіны, заявіў сакратар Рады нацыянальнай бяспекі і абароны (РНБА) Украіны Аляксей Данілаў у эфіры нацыянальнага тэлемарафону.
13.12.2022 / 22:40
Аляксей Данілаў. Фота: УНІАН
Данілаў пракаментаваў сітуацыю ў Беларусі:
«Сапраўды, сёння там былі вучэнні. Мы ведалі, што яны там будуць адбывацца. Для нас гэта не было нечаканасцю. Мы гатовыя да любога развіцця падзей, калі Расія сумесна з Беларуссю будуць здзяйсняць тыя ці іншыя акты агрэсіі».
Данілаў падкрэсліў, што прапрацоўка ўсіх патэнцыйных ваенных сцэнарыяў пачалася даўно. Менавіта таму УСУ цалкам гатовыя.
«Калі хтосьці сунецца на нашу тэрыторыю, то я яму не зайздрошчу», — падсумаваў сакратар РНБА Украіны.