Да 10 гадоў калоніі — чатырох палітзняволеных салігорцаў асудзілі на вялікія тэрміны
У Мінскім абласным судзе агучылі прысуд чатыром палітзняволеным жыхарам Салігоршчыны. Суддзя Алена Міснік прызначыла па «пратэсных артыкулах» мужу і жонцы Алегу і Таццяне Бірулям — па 6 гадоў калоніі, трэнеру Алегу Гаўрылаву — 10 гадоў калоніі, Сяргею Пасюку — 5,5 года калоніі, піша «Вясна».
13.12.2022 / 11:59
Іх затрымалі за распаўсюд «пратэсных» газет 13 снежня 2021 года, але падчас следства спіс артыкулаў Крымінальнага кодэкса, па якіх іх абвінавачвалі, вырас да пяці.
Згодна з матэрыяламі справы, са студзеня па люты 2021 года салігорцы наносілі на аб'екты інфраструктуры надпісы і малюнкі, «здзяйсняючы іх псаванне». Таксама яны распаўсюджвалі ўлёткі і газеты «экстрэмісцкага» зместу.
Агулам чатырох палітвязняў асудзілі па наступных артыкулах Крымінальнага кодэкса:
- ч. 2 арт. 367 (паклёп у дачыненні да Лукашэнкі);
- арт. 341 (апаганьванне збудаванняў і псаванне маёмасці);
- ч. 3 арт. 130 (распальванне іншай сацыяльнай варожасці);
- ч. 1 арт. 361 (заклікі да мер абмежавальнага характару (санкцый), іншых дзеянняў, накіраваных на прычыненне шкоды нацбяспецы Беларусі);
- ч. 1 арт. 361-4 (садзейнічанне экстрэмісцкай дзейнасці).