Рэцэпт на выхадныя. Шакаладныя кексы з бураком — мяккія і смачныя
Зробленыя з любоўю шакаладныя кексы могуць стаць добрым пачастункам да сямейнай гарбаты, а рэцэпту дасць рады нават дзіця. Хочаце зрабіць кексы больш пышнымі і вільготнымі? Дадайце ў цеста бурак.
17.12.2022 / 14:28
Фота: BBC Food
Каб згатаваць шакаладныя кексы з бураком, вам спатрэбіцца:
- 75 грамаў какава-парашку або парашку для гатавання гарачага шакаладу
- 180 грамаў мукі
- 2 чайныя лыжкі разрыхляльніку
- 250 грамаў цукру
- 250 грамаў вараных буракоў
- 3 яйкі (пажадана вялікія)
- 200 мілілітраў алею
- 1 чайная лыжка ванільнага экстракту (можна замяніць 15 грамамі ванільнага цукру ці паловай чайнай лыжкі ваніліну)
- цукровая пудра, каб прысыпаць кексы.
- Разагрэйце духоўку да 180 градусаў. Падрыхтуйце папяровыя формы для кексаў або вышмаруйце маслам металічныя формы.
- Прасейце ў міску какава-парашок, муку і разрыхляльнік. Дадайце цукар і перамяшайце. Адстаўце ўбок.
- Здрабніце буракі ў кухонным камбайне ці з дапамогай блэндара. Спачатку дадайце яйкі па адным, потым — ваніль і алей, перамяшайце да аднастайнасці.
- У сярэдзіне сумесі з сухіх інгрэдыентаў зрабіце паглыбленне. Уліце туды бурачную сумесь і перамяшайце. Раскладзіце цеста па формах для кексаў.
- Выпякайце кексы 30 хвілін або пакуль іх верх не стане цвёрдым пры націсканні пальцам.
- Астудзіце кексы, пасыпце іх цукровай пудрай і падавайце.