Амерыканскі спартыўны журналіст памёр падчас матча Нідэрланды — Аргенціна ў Катары. Яго брат лічыць гэта забойствам
Грант Уол быў адным з самых вядомых футбольных журналістаў у ЗША. Ён працаваў на васьмі чэмпіянатах свету.
10.12.2022 / 11:36
Па словах рэпарцёраў, якія сядзелі побач з ім, Уолу стала дрэнна падчас дадатковага часу гульні. Журналісты паклікалі дапамогу, і работнікі экстранных службаў прыбылі на месца і паспрабавалі аказаць яму першую дапамогу.
Як вынікае са слоў арганізатараў турніру, журналіста адправілі ў бальніцу, аднак выратаваць яго не ўдалося. Федэрацыя футбола ЗША і прэзідэнт ФІФА Джані Інфанціна выказалі спачуванні родным і блізкім Гранта Уола.
Уол адкрыта крытыкаваў арганізатараў турніру, абвінавачваючы ў абыякавасці да смерцяў рабочых, якія працавалі на будаўніцтве аб'ектаў для ЧС.
У апошнія дні Грант скардзіўся на дрэннае самаадчуванне і дыскамфорт у грудзях. У пачатку турніру Уола не пусцілі на стадыён у футболцы з вясёлкавай сімволікай, якую ён надзеў у падтрымку ЛГБТ, і затрымалі на 25 хвілін. Пазней ФІФА папрасіла ў яго прабачэння.
Брат журналіста Эрык, адкрыты гей, заявіў, што лічыць смерць Уола забойствам. Паводле яго слоў, Грант Уол расказваў яму аб пагрозах.