Viciebskaja suddzia zabaraniła palitviaźniu-ŭkraincu vykarystoŭvać u apošnim słovie leksiku z rodnaj movy
U sudzie Viciebskaha rajona praciahvajecca razhlad kryminalnaj spravy ŭ dačynieńni da 68-hadovaha žychara vioski Chatola Viciebskaha rajona, palitviaźnia i ŭradženca Ukrainy Alaksandra Patapava. Paśla ranieńnia i hibieli vo Ukrainie ad ruk rasijskich vajskoŭcaŭ jahonaj dački Aksany i plamieńnicy mužčyna pakinuŭ kamientary ŭ «Adnakłaśnikach», jakija ekśpiertyza paličyła «abraźlivymi», piša «Viasna».
15.11.2022 / 18:26
U pieršy dzień sudovaha pracesu było ahučana abvinavačańnie. Uradženiec Ukrainy ŭ Biełarusi žyvie z 1997 hoda. Paśla ranieńnia i hibieli va Ukrainie ad ruk rasijskich vajskoŭcaŭ jahonaj dački Aksany i plamieńnicy, znachodziačysia pad upłyvam emocyj, 8 i 16 lipienia 2022 hoda jon raźmiaściŭ u sacyjalnaj sietcy dva kamientary, jakija ekśpiertyza paličyła «abraźlivymi».
Siońnia ŭ sudzie adbylisia sprečki bakoŭ. Dziaržabvinavaŭca zaprasiła pazbaŭleńnia voli terminam na dva hady va ŭmovach ahulnaha režymu. Advakatka nastojvała na aryšcie, pakolki Patapaŭ pryznaŭ svaju vinu i takaja miera praduhledžanaja sankcyjami artykuła 368 Kryminalnaha kodeksa.
Svajo apošniaje słova Patapaŭ pačaŭ na ruskaj movie, pieramiešvajučy jaje ź biełaruskimi i ŭkrainskimi słovami: «Pavažny sud, pavažny prakuror! Ja ščyra kajusia ŭ tym, što zrabiŭ…».
Adnak suddzia Natalla Traćciakova pierabiła jaho: «Abvinavačany! Vy źjaŭlajeciesia hramadzianinam Biełarusi, tamu pavinny havaryć na ruskaj movie albo na biełaruskaj».
— Prabačcie mianie, — praciahvaŭ pa-biełarusku Patapaŭ. — Ja kajusia…
Prysud Alaksandru Patapavu budzie abvieščany 16 listapada ŭ 14-50.