Мэр латвійскага Даўгаўпілса назваў Крым расійскім і абвінаваціў у забойствах у Бучы ў тым ліку Украіну і ЗША. У Кіеве яму адказалі
У Міністэрстве замежных спраў Украіны пракаментавалі выказванні мэра Даўгаўпілса — другога найбуйнейшага горада Латвіі — Андрэйса Элксніньша аб «расійскім Крыме» і ўхіленні палітыка ад таго, каб назваць Расію агрэсарам і адзіным вінаватым у вайне.
07.11.2022 / 12:59
«Мэр латвійскага горада Даўгаўпілс Андрэйс Элксніньш апраўдвае злачынствы Расіі ва Украіне. Нядзіўна, што яго палітычная сіла апынулася на абочыне палітыкі па выніках апошніх выбараў у Сейм Латвіі», — адзначыў прэс-сакратар украінскага знешнепалітычнага ведамства Алег Нікаленка.
Ён дадаў, што, на шчасце, «выказванні гэтага маргінальнага дзеяча не адлюстроўваюць ні афіцыйнай пазіцыі дружалюбнай для нас Латвіі, ні поглядаў абсалютнай большасці латвійцаў, якія не толькі шчыра спачуваюць, але і актыўна дапамагаюць Украіне ў яе барацьбе супраць расійскай агрэсіі».
Неадназначныя заявы Элксніньша прагучалі ў эфіры тэлебачання. Яго некалькі разоў перапыталі, ці хацеў бы ён перамогі Украіны і паразы Расіі, на што ён некалькі разоў запар адказваў, што «ў вайне не будзе пераможцаў» і гэта чалавечая трагедыя.
Андрэйс Элксніньш
На пытанне аб Крыме мэр сказаў, што «Крым з'яўляецца часткай Расійскай Федэрацыі». Пасля заўвагі, што амаль уся міжнародная супольнасць не прызнала акупацыю паўвострава, ён адказаў, што гэта так, але «немагчыма адмаўляць факт, што яго ўключылі ў склад РФ, і што ўвесь свет працягнуў пасля гэтага супрацоўнічаць з Расіяй».
Адказваючы на пытанне аб адказнасці Расіі за забойствы цывільных у Бучы, мэр сказаў, што «за ўсё, што адбылося, адказныя і Расія, і Украіна, і ЗША».
Андрэйс Элксніньш з'яўляецца прадстаўніком сацыял-дэмакратычнай партыі «Saskaņa» («Згода»), якая традыцыйна мела значную падтрымку сярод рускамоўных жыхароў Латвіі, і толькі на апошніх выбарах у Сейм восенню 2022 года не змагла пераадолець 5% бар'ер.