Na vajnie va Ukrainie zahinuŭ protaijerej Michaił Vasiljeŭ. Jon zaklikaŭ žančyn bolš naradžać, kab nie škadavać dziaciej dla frontu
Ranicaj 6 listapada 2022 hoda ŭ zonie «śpiecyjalnaj vajennaj apieracyi va Ukrainie pry vykanańni pastyrskich abaviazkaŭ» zahinuŭ kliryk Maskoŭskaj jeparchii, nastajaciel chrama vialikapakutnicy Varvary i prapadobnaha Ilii Muramca — Patryjaršaha padvorka ŭ p. Ułasicha Maskoŭskaj vobłaści protaijerej Michaił Vasiljeŭ. Pra heta paviedamlajecca na sajcie RPC.
06.11.2022 / 18:22
Michaił Vasiljeŭ. Skryn videa
Vasiljeŭ naradziŭsia ŭ 1971 hodzie. Vypusknik Maskoŭskaha dziaržaŭnaha ŭniviersiteta im. M.U. Łamanosava i Akademii Hienieralnaha štaba US RF.
Uznaharodžany ordenam Mužnaści, ordenam Sierhija Radaniežskaha III stupieni, miedalom ordena «Za zasłuhi pierad Ajčynaj» II stupieni.
Jak śviatar udzielničaŭ u kamandziroŭkach u «haračyja kropki» ŭ Kosavie, Bośnii, Abchazii, Kyrhyzstanie, na Paŭnočnym Kaŭkazie i ŭ Siryi.
Vasiljeŭ byŭ nastajacielem chrama vialikapakutnicy Varvary i prapadobnaha Ilii Muramca — Patryjaršaha padvorka ŭ pasiołku Ułasicha Maskoŭskaj vobłaści. Heta chram pry štabie Rakietnych vojskaŭ stratehičnaha pryznačeńnia Rasii.
Jon staŭ šyroka viadomy vosieńniu 2022 hoda paśla intervju, dzie paraiŭ žančynam bolš naradžać, kab było nie tak strašna adpraŭlać dziaciej na vajnu.
«Kožnaj damie Haspodź papuściŭ naradzić mnostva dzietak. I kali dama, vykonvajučy hetuju zapaviedź «pładzieciesia i množciesia», admoviłasia ad štučnych sposabaŭ pierapynieńnia ciažarnaści, u samym šyrokim śpiektry, to vidavočna, dziciatka ŭ jaje budzie nie adno. A značyć, joj nie tak baluča i strašna budzie ź im rasstavacca, chaj navat na čas. Nie tak strašny čort, jak jaho malujuć. Boh nie vydaść, śvińnia nie zjeść», — skazaŭ Vasiljeŭ.