Палітзняволеных мужа і жонку асудзілі да «хатняй хіміі» паводле «народнага артыкула»
24 кастрычніка ў судзе Маскоўскага раёна Мінска вынеслі вырак палітзняволеным мужу і жонцы — Яўгену і Анжаліцы Ярмак. Іх асудзілі да 2,5 гадоў абмежавання волі без накіравання ў ПУАТ — да «хатняй хіміі» — кожнага, паведамляе «Вясна».
27.10.2022 / 16:08
Суддзя Сяргей Кацар прызнаў іх вінаватымі паводле арт. 342 Крымінальнага кодэкса. Першапачаткова ім таксама інкрымінавалі арт. 368 Крымінальнага кодэкса, аднак праз тэрмін даўніны яго знялі.
Ярмакі былі затрыманыя ў Мінску 16 чэрвеня 2022 года. Праўладныя тэлеграм-каналы паведамлялі, што Анжаліка «хайпавала ў дні пратэстаў, пазіруючы на фоне сілавікоў, фота выкладвала ў інстаграм». На «пакаяльным відэа» дзяўчына «прызнавалася» ва ўдзеле ў акцыях пратэсту і «перакрыцці дарог».
Яўгена спачатку асудзілі па адміністрацыйнай справе, затым узялі пад варту па крымінальнай справе аб групавых дзеяннях, якія груба парушаюць грамадскі парадак (арт. 342 Крымінальнага кодэксу).