Palitviaźniu Jaŭhienu Baturu dali «chimiju»
Siońnia ŭ Centralnym sudzie Minska suddzia Viktoryja Šabunia ahučyła čarhovy palityčny prysud: palitviaźnia Jaŭhiena Baturu asudzili da 2 hadoŭ «chimii» z nakiravańniem, piša «Novy čas».
30.09.2022 / 10:38
Sud nad Jaŭhienam Baturam pačaŭsia ŭčora, 29 vieraśnia. Častka jaho była zakrytaj. Mužčynu abvinavačvali pavodle č. 1 art. 342 Kryminalnaha kodeksa («Hrupavyja dziejańni, jakija hruba parušajuć hramadski paradak»). Padstavaj staŭ udzieł u maršy MTZ 14 žniŭnia 2020 hoda.
Staršaja pamočnica prakurora Centralnaha rajona Kazłova zaprasiła dla palitviaźnia 2 hady abmiežavańnia voli z nakiravańniem u papraŭčuju ŭstanovu adkrytaha typu.
Jaŭhien Batura vinu pryznaŭ častkova, a ŭ apošnim słovie paprasiŭ pry pryznačeńni pakarańnia ŭličyć asabistuju situacyju, jakaja dla jaho ciapier pryjarytetnaja: ciažarnaść žonki i vyjaŭlenaje ankałahičnaje zachvorvańnie ŭ baćki.
Advakatka palitviaźnia Taćciana Lišankova prasiła apraŭdać jaje padabaronnaha, pakolki ŭ jaho dziejańniach adsutničaje skład złačynstva.
U vyniku suddzia Viktoryja Šabunia pryznačyła Jaŭhienu pakarańnie ŭ vyhladzie dvuch hadoŭ «chimii».
Jaho vyzvalili ŭ zale suda pad padpisku ab niavyjeździe, aryšt z majomaści źniali.