Siamja pabudavała ŭtulny dom usiaho za 18 tysiač dalaraŭ
Andrej pačaŭ budavać ułasny dom niekalki hadoŭ tamu. Tady małady čałaviek maryŭ uładkavać chałaściacki kutok, dzie budzie šmat miesca dla vialikaj kampanii siabroŭ. Žyćcio jaho płany krychu adkarektavała — u hatovyja kvadraty Andrej zajechaŭ užo z žonkaj Inaj. Realt.by raskazvaje historyju doma ź niezvyčajnym azdableńniem, jaki kaštavaŭ usiaho 18 tysiač dalaraŭ.
23.08.2022 / 20:33
«Bieź siabroŭ ja b nie zmoh pabudavać dom tak tanna»
Maładaja siamja žyvie niedaloka ad centra Bresta. Andrej pabudavaŭ svoj dom na dziedaŭskim učastku, a dakładniej, na miescy chlava. Jon pačaŭ uzvodzić jaho ŭ 2017 hodzie, kali jašče byŭ chałaściakom, chacieŭ zrabić miesca, dzie možna źbiracca ź siabrami i ładzić tusoŭki. A voś zakančvaŭ unutranaje azdableńnie ŭžo razam ź Inaj. Jany śpiašalisia, bo chacieli paśla viasiella adrazu zajechać u novaje žytło. Im udałosia ŭsio skončyć u termin.
— My prachodzili bajavuju škołu ramontu i siamiejnaha žyćcia adnačasova. Zasialalisia, kali jašče nie była navat hatovaja kuchnia. Ciapier zastalisia tolki źniešnija pracy: fasadnaje ŭciapleńnie i afarboŭka — pacichu darablajem, — adznačaje Andrej. — Ja maryŭ ab prastornaj zale, kaminie i spalni, bieź vialikaj kolkaści pakojaŭ i ŭsiakich kamor. Tak i atrymałasia. Mahčyma, kamuści jon zdasca niepraktyčnym, bo adrazu ludzi traplajuć u zału i kuchniu, niama nijakaha harderoba ci kalidora, ale nam dvaim pakul vielmi padabajecca.
U Andreja nie było vialikaha biudžetu. Jon chacieŭ patracić na dom 20 tysiač dalaraŭ. Siabry kazali, što heta nierealna i finalnaja suma zaŭsiody atrymlivajecca vyšejšaj, čym zapłanavanaja. Ale ŭ vyniku małady čałaviek patraciŭ usiaho 18 tysiač: u hetuju sumu taksama ŭvachodzić azdableńnie i mebla.
Uładalnik katedža pryznajecca, što nialohkaj zadačaj było vyznačycca z materyjałam.
— Ja lublu dreva, ale ja nie chacieŭ, kab dom byŭ padobny na prytułak leśnika ci łaźniu. Da taho ž, hety materyjał patrabuje šmat kłopatu. Tamu spynilisia na hazasilikatnych błokach, — raspaviadaje Andrej. Jon raniej pracavaŭ na budaŭničych abjektach, ale zajmaŭsia bolš unutranaj apracoŭkaj, tamu ŭ pracesie ŭźviadzieńnia svajho katedža šmat čamu pryjšłosia navučycca. — Bieź siabroŭ ja b nie zmoh pabudavać jaho tak tanna. My razam zalivali bieton. Adzin navučyŭ kłaści błoki — pakazaŭ mnie na prykładzie, abkłaŭšy pieršy šerah. Z dacham dapamoh moj dziadźka, jaki nie ŭziaŭ ź mianie ni kapiejki. Unutranaje azdableńnie, draŭlanuju stol, sioje-toje z mebli ja ŭžo rabiŭ sam.
Pačatak budaŭnictva. Fota: archiŭ hieroja
U interjery — łožak, što łunaje nad padłohaju i lusterka sa śpiłu jasienia
Dom atrymaŭsia na 75 «kvadrataŭ». Pakoj na druhim paviersie zajmaje 26,5 m². Usio astatniaje prypadaje na pieršy pavierch: kuchnia-haścioŭnia, sanvuzieł z dušam i spalnia, dzie ŭ pavietry łunaje draŭlany łožak.
— Siabar-zvarščyk zrabiŭ mietaličny karkas, jaki my pramacavali da ściany. Dalej stajała pytańnie, jak jaho abšalavać drevam. Padumaŭšy, vyrašyŭ vykarystoŭvać reštki z dachu. Dla padhałoŭja spatrebilisia nieabraznyja doški, jakija złučyŭ epaksidnaj smałoj.
Fota: archiŭ hieroja
Na prylehłaj da łožka ścianie ŭsio abšyta bietonnymi plitami. Ich zrabiŭ dla Andreja brat.
— Jany davoli vialikija, ale dzie-nidzie ja ich rezaŭ i kambinavaŭ na ściency, kab atrymać patrebny malunak. Na plitcy jość takija kruhłyja vyjemki. Z-za ich maja mama padumała, što ja ich nie tym bokam da ściany prykłaŭ, — śmiajecca chłopiec.
Andrej kaža, što ŭ ich amal atrymałasia realizavać styl łoft: jość i bieton, i krychu mietału. Z ahulnaj kancepcyi ŭdała vybivajucca draŭlanyja belki i rejki na stoli. Jany nadajuć prastory lohkaści.
— Ja nie źbiraŭsia rabić takuju stol, płanavaŭ usio zašyć hipsakardonam, pašpaklavać, pafarbavać — usio standartna. Ale tak było škada ich chavać! Da taho ž, kab dabicca takoha koleru belek, ja abpalvaŭ ich hazavaj harełkaj. Było b heta padčas ustaloŭki, usio prachodziła by kudy lahčej. Potym z dapamohaj mietaličnaj ščotki vyčyščaŭ uvieś har. U kuchni ja zamaročyŭsia jašče bolš i papracavaŭ jašče i bałharkaj. Z-za hetaha belki ŭ kožnaj zonie adroźnivajucca adcieńniem.
Andrej taksama vyrašyŭ zaścialić stol śvietłymi draŭlanymi rejkami, ale pierad hetym naciahnuŭ zvyčajny čorny spanbond, jaki bačny ŭ ščylinach.
— Bajaŭsia, što z časam tam budzie źbiracca pavucińnie, ale pakul nie paškadavaŭ.
U domie sumieščany sanvuzieł. Zamiest vanny zrabili duš, jaki chutka dačakaje svajoj šklanoj piareharadki, ale i ciapier łužyn nidzie niama, bo źliŭ znachodzicca ŭ ledź prykmietnym pahłybleńni.
Ścieny dušavoj upryhožvajuć plitka i drobnaja mazaika. Samym masiŭnym elemientam u pakoi źjaŭlajecca lusterka ručnoj pracy sa śpiłu jasienia.
Druhi pavierch atrymaŭsia adkrytym, ale z dapamohaj hipsakardonu jaho ź lohkaściu možna budzie pierarabić u asobny dziciačy.
— My tut taksama ekśpierymientavali z dacham. U nas zastavalisia doški, jakija ja chacieŭ prystasavać nakštałt rejek, ale ŭ realnaści zdavałasia — jak u karoŭniku, tamu pierarabili. Ścieny my taksama bačyli draŭlanymi, tamu vyrašyli adštukavać łaminatam, — pakazvaje Andrej. — Nad padłohaj my jašče dumajem. Staryja babuliny dyvany, darečy, vielmi pryjšlisia da interjeru. Šafy ja zrabiŭ uzdoŭž ścien.
Aciaplajecca dom z dapamohaj hazavaha katła i ciopłaj padłohi pa ŭsim pieršym paviersie. Na druhim uzroŭni ciapła dastatkova, ale Andrej vyvieŭ truby, kab u budučym zrabić tut batarei. Jašče jość vialiki kamin.
«Plitačnik prarezaŭ ścianu i prabiŭ trubu z vadoj»
Kasiaki ŭ budaŭnictvie taksama byli.
— Šukaŭ plitačnika i davieryŭsia pieršym lepšym — dziadulu, jaki kaliści hetaj spravaj zajmaŭsia, — uspaminaje Andrej. — Jon abiacaŭ mnie ŭsio zrabić jak treba. Ja na čas źjechaŭ i nie moh kantralavać uvieś praces. Prasiŭ, kab u vypadku pamyłki jon nie praciahvaŭ pracu, što jon, kaniečnie, nie zrabiŭ. U vyniku švy ŭ niekatorych miescach nie sychodzilisia. Hety kasiak vypraŭlaŭ potym muž majoj siastry. Kudy bolš surjoznaj była inšaja prablema. Plitačnik zamiest taho, kab razrezać plitku i padahnać jaje da ściany, prarezaŭ ścianu. Mužčyna nie pahladzieŭ, što ŭ mianie tam vyviedzienaja truba z vadoj i prabiŭ jaje, ujaŭlajecie? Mnie pryjšłosia plitku vyrazać, kab pierapajać hetyja truby. Nibyta i zekanomiŭ na pracy, ale patraciŭ čas na vypraŭleńnie kasiakoŭ.
Siamja ŭsio robić pastupova, pa mahčymaści. Voś-voś u domie źjaviacca barnyja kresły. Andrej ź siabram užo pačali varyć asnovu pad ich. Paśla pačnuć budaŭnictva terasy, dzie budzie dobra ŭ lubuju paru hoda.