Pamierła Alena Koškina
Jana była fizikam i pisała praniźlivuju paeziju na ruskaj movie.
16.08.2022 / 14:08
Pra jaje śmierć napisała ŭ fejsbuku Jułija Čarniaŭskaja.
«Pamierła Lola, Alena Koškina. My nie razmaŭlali ź joj u apošnija paŭhoda — tamu, čamu ciapier pierastajuć kamunikavać. My nie svarylisia i nie spračalisia, heta nie mieła sensu. Ja viedała, što jana była čystym čałaviekam, celnym (zanadta celnym dla realnaści, što rujnujecca) i viernym tamu, u što daŭno pavieryła (zanadta viernym, tak, heta byvaje zanadta). U jaje ŭsio vyrašałasia raz i nazaŭždy. Jana nie mianiała svaich pierakanańniaŭ i pohladaŭ. Jana była kateharyčnaja i ŭpartaja. Byvała rezkaja i niespraviadlivaja. Jana była nialohki i… vielmi dobry čałaviek.
Jana była sapraŭdy dobraja i ščodraja. Jana była mužnaja. Jana vałancioryła ŭ samych strašnych addzialeńniach samych strašnych balnic. Vykładała fiziku. Padzarablała dvornikam, adnačasna lepiačy dla minakoŭ śniehavikoŭ, prosta — paradavać. Nijakaj pracy nie curałasia, ničoha nie bajałasia. I jana była praniźliva talenavitaja. Kali jaje vieršy chadzili pa Minsku ŭ śpisach, i mnie było 18, ja maryła ź joiu paznajomicca. Tady ja nie viedała, što jaje sakret — pryroda. Pryroda paeta. Takimi naradžajucca. Takoj jana była, takoj i zastałasia. Pa mnie, jana była i zastałasia dziva-paetam.
Toje, što Lola pamre, mnie stała jasna zadoŭha da taho, jak joj pastavili dyjahnaz. Paśla toj viasnovaj nočy, kali na praciahu niekalkich chvilin na vačach Loli raptam pamierła jaje dačka Tomuška.
Paśla hetaha vyratavacca jana nie mahła i nie chacieła. Jana chacieła da Tomuški.
I kali kožnamu budzie pa viery jaho, to Lola ŭžo sapraŭdy z Tomuškaj. Carstva im Niabiesnaje. Razam», — napisała Jułija Čarniaŭskaja.