Dva hady chimii dali ŭ Baranavičach za repost fotazdymka Kim Čen Yna
Siońnia ŭ Baranavickim RAUS adbyŭsia vyjazny sud nad 30-hadovym Alaksandram Maruškievičam. Jaho pryznali vinavatym pavodle č. 1 art. 368 KK («Abraza Łukašenki») i asudzili da dvuch hadoŭ «chatniaj chimii». Spravu razhladaŭ sudździa Mikałaj Kmita, piša «Viasna».
12.08.2022 / 19:14
Abvinavačańnie palahała ŭ tym, što ŭ 2020 hodzie Maruškievič raźmiaściŭ u siabie ŭ storyz u instahramie vyjavu lidara KNDR Kim Čen Yna z vusami i podpisam «Kon Čien Yj». Namieśnica Baranavickaha mižrajonnaha prakurora, radnik justycyi Ina Danilčyk vyrašyła, što Kim Čen Yn z vusami — heta Alaksandr Łukašenka. Maruškieviča vyklikali ŭ milicyju ŭžo ŭ 2022 hodzie i ŭ archivie storyz znajšli hety fotazdymak.
Maruškievič pryznaŭ vinu całkam. Viadoma, što ŭ jaho troje małaletnich dziaciej (6 i 4 hadoŭ, a taksama 8-miesiačnaje małoje). Taksama viadoma, što na sud pryvieźli inšych administracyjna asudžanych, kab zładzić «publičnaje pakarańnie» i takim čynam, vierahodna, praduchilić dalejšyja abrazy Łukašenki.