U Minsielhascharčy raskazali, jak dajuć rady pierabojam z tetrapakami
Namieśnik ministra sielskaj haspadarki i charčavańnia Vadzim Šahojka zajaviŭ, što biełaruskija vytvorcy ŭžo naładzili kantakty z zamiežnymi pastaŭščykami.
11.08.2022 / 18:08
«Znachodzim patencyjnych pastaŭščykoŭ, vyvučajem ich pradukcyju i mahčymaści. Kab minimizavać ryzyki i nie kupić kata ŭ miašku, my pieršapačatkova prapracoŭvajem usie techničnyja charaktarystyki», — skazaŭ Šahojka.
Pavodle jaho słoŭ, ciapier razhladajucca varyjanty pastavak z Kitaja i Turcyi. Niekatoryja pradpryjemstvy ŭžo zavieźli ŭzory tetrapakaŭ i viaduć techničnyja vyprabavańni. «Starajemsia nie zaciahvać čas z vyprabavańniami, pieramovami i vyrašać usie pytańni dosyć apieratyŭna», — adznačyŭ namieśnik ministra.
Jon paviedamiŭ, što jość nievialikaje źnižeńnie ekspartu małočnaj pradukcyi z-za adsutnaści ŭpakoŭki, adnak idzie jaje zamiaščeńnie PET-butelkami.
«Rasijskaja Fiederacyja pastaŭlaje nam tetrapaki pavodle reštkavaha pryncypu, tamu choć i ź pierabojami, ale pastaŭki zachavalisia», — dadaŭ Vadzim Šahojka.