U Homieli čarhovy palityčny prysud za kamientaryj. Kab zatrymać abvinavačanaha, zładzili cełuju śpiecapieracyju
Homielca Uładzimira Rabčanku abvinavačvali pavodle art. 130 č. 1 (raspalvańnie rasavaj, nacyjanalnaj, relihijnaj albo inšaj sacyjalnaj varožaści) i art. 369 (źniavaha pradstaŭnika ŭłady) za kamientaryi ŭ bok pradstaŭnikoŭ ułady i siłavikoŭ, jakich mužčyna, pa mierkavańni śledstva, abražaŭ u telehram-čatach.
10.08.2022 / 18:09
Budynak Homielskaha abłasnoha suda
Jak paviedamlaje «Homielskaja viasna», padčas suda stała viadoma, što Uładzimir Rabčanka pakinuŭ kamientaryj «Ponimajet tvar, čto za vsio otvietiť pridiotsia» pad pastom pra namieśnika ministra MUS RB Hienadzia Kazakieviča ŭ čacie «Kibierpartyzany», a jašče pisaŭ kamientaryi z «niehatyŭnaj acenkaj» supracoŭnikaŭ MUS, suddziaŭ, dziaržaŭnych słužboŭcaŭ, supracoŭnikaŭ US.
Kab zatrymać Rabčanku, siłaviki zładzili cełuju śpiecapieracyju: jany vyklikali na dopyt staroha siabra mužčyny — Stanisłava Anzela, atrymali dostup da jaho mabilnaha telefona i takim čynam vyšukvali kamientaryi Uładzimira. Padčas suda Anzel patłumačyŭ, što raspaviadaŭ supracoŭnikam milicyi, što ŭ čatach z boku Uładzimira «byli vykazvańni, paśla jakich jon moh paciarpieć».
«Ja razumieŭ, što mianie mohuć vykarystać jak instrumient, i mnie vielmi soramna pierad Vałodziem», — skazaŭ Stanisłaŭ u sudzie.
Sam Uładzimir Rabčanka ŭ sudzie pryznaŭ svaju vinu. Suddzia Homielskaha abłasnoha suda Aleh Charoška pastanaviŭ pakarać mužčynu dvuma z pałovaj hadami pazbaŭleńnia voli ŭ kałonii ahulnaha režymu, a taksama aštrafavaŭ na 100 bazavych vieličyń. Mabilny telefon Rabčanki suddzia vyrašyŭ kanfiskavać u dachod dziaržavy.