Viciebskaha tyktokiera pasadzili za antyvajenny vierš, u jakim uhledzieli abrazu Łukašenki
Na 1 hod i 9 miesiacaŭ pazbaŭleńnia voli asudzili 62-hadovaha žychara vioski Vymna Viciebskaha rajona Alaksieja Viačerniaha. Jak pišuć «Narodnyja naviny Viciebska», nahodaj staŭ videarolik ź vieršam u TikTok, jaki prahledzieli 244 razy.
28.07.2022 / 16:40
Videarolik ź vieršam byŭ apublikavany 20 sakavika. Śledstva znajšło ŭ im «vyjaŭlenuju ŭ nieprystojnaj, prynižanaj i źniavažlivaj formie publičnuju abrazu Alaksandra Łukašenki, što niehatyŭna aceńvaje apošniaha i ŭtrymlivaje nienarmatyŭnuju formu maŭlenčaha vykazvańnia».
Mužčyna raskazaŭ, što vierš jon napisaŭ paśla taho, jak z terytoryi Biełarusi byli abstralanyja ŭkrainskija harady. Potym jon zapisaŭ videarolik i apublikavaŭ u sacsietcy.
Siłaviki praviali pieratrus doma ŭ Alaksieja Viačerniaha, znajšli sšytak z rukapisam vierša, a taksama smartfon z ulikovym zapisam TikTok.
Mužčynu pryznali vinavatym u publičnaj abrazie Łukašenki.
Alaksiej Viačerni — etničny ŭkrainiec, jon naradziŭsia ŭ Čarkaskim rajonie. U Vymnie stvaryŭ ahraekasiadzibu, dzie raście bolš za 100 śliŭ i kala 90 višań. Mužčyna aktyŭna ŭdzielničaje ŭ samadziejnaści i fiestyvali nacyjanalnych kultur. Pra jaho nieadnarazova pisała rajonnaja hazieta «Žyćcio Prydźvińnia».