Baćka Sofji Sapiehi pahasiŭ štraf pa prysudzie dački. Ciapier jaje mohuć ekstradavać u Rasiju
Rasijanka Sofja Sapieha spłaciła štraf pamieram 175 tysiač rubloŭ (prykładna 68 tysiač dalaraŭ). Jaho spahnaŭ sud na karyść bolš za 70 paciarpiełych siłavikoŭ, čynoŭnikaŭ i suddziaŭ, paviedamlaje BBC.
25.07.2022 / 18:33
Sapiehu asudzili na 6 hadoŭ kałonii za administravańnie apazicyjnaha telehram-kanała «Čornaja kniha Biełarusi». Apłata štrafu likviduje farmalnyja pieraškody da pamiłavańnia Łukašenkam ci jaje pieradačy ŭ Rasiju dla adbyćcia pakarańnia.
Sofja Sapieha pahasiła ŭsiu sumu, jakuju jana abaviazanaja była vypłacić pavodle prysudu, raskazaŭ Bi-bi-si advakat siamji Sapiehi Anton Hašynski. Pavodle jaho słoŭ, štraf Sofji apłaciŭ jaje baćka Andrej Sapieha, jaki žyvie ŭ Rasii.
Pa słovach advakata Hašynskaha, pa zakonie biez pahašeńnia škody ŭłady Biełarusi nie mohuć pieradać asudžanuju ŭ Rasiju. U vyrašeńni pytańnia ab pamiłavańni pahašeńnie doŭhu taksama źjaŭlajecca klučavym umovaj.
Sofja Sapieha adbyvaje termin u Homielskaj žanočaj kałonii. Jana pryznanaja vinavataj u raspalvańni sacyjalnaj varožaści i niezakonnym zbory źviestak ab pryvatnym žyćci.
U kancy červienia Sapieha źviarnułasia z kałonii da Łukašenki z chadajnictvam ab pamiłavańni.
Alaksandr Łukašenka ŭ červieni zajaviŭ žurnalistam, što nie vyklučaje pieradaču Sapiehi Rasii.