Amierykancy dajuć Ukrainie jašče čatyry HIMARS i 500 dronaŭ-kamikadze
Aficyjny pradstaŭnik Biełaha doma Džon Kirbi paviedamiŭ, što ŭ piatnicu ZŠA zaćvierdzili novy pakiet vajskovaj dapamohi Ukrainie na sumu 270 młn dalaraŭ, piša Bi-bi-si.
22.07.2022 / 22:05
Ustanoŭka HIMARS na vučeńniach u Danii, 24 maja 2022 hoda. Fota: Vikipiedyja
Siarod inšaha Kijeŭ atrymaje jašče čatyry reaktyŭnyja sistemy załpavaha ahniu HIMARS (i ich ahulnaja kolkaść na ŭzbrajeńni ŭkrainskaj armii dasiahnie 20 štuk), a taksama da 500 bajavych dronaŭ-kamikadze Phoenix Ghost i 36 tys. artyleryjskich snaradaŭ.
Pra toje, što ZŠA majuć namier vydzielić Ukrainie jašče čatyry ŭstanoŭki HIMARS, u sieradu paviedamiŭ amierykanski ministr abarony Łojd Ościn. Ukraina taksama atrymała peŭnuju kolkaść padobnych sistem MLRS M270.
Ukrainskija ŭłady kažuć, što pastaŭki takoj vysokadakładnaj i dalnabojnaj zbroi, jak HIMARS, značna źmianiajuć situacyju na poli boju. Adnak u Kijevie padkreślivajuć, što USU majuć patrebu ŭ našmat bolšaj kolkaści takich sistem: daradca kiraŭnika Ofisa prezidenta Alaksiej Arastovič zajaŭlaŭ, što bałans sił zmohuć karennym čynam pierałamać kala 40-60 takich ustanovak.