Z-za sankcyj u Rasii ŭźnikli prablemy z vypuskam žujki Orbit. Ich adčujuć i biełarusy
U karparacyi Mars u Rasii paŭstali składanaści z vytvorčaściu žavalnaj humki pad brendam Orbit, piša hazieta «Kommiersant».
22.07.2022 / 10:03
Fota: Kommersant.ru
Pa słovach krynic vydańnia ŭ bujnych handlovych sietkach, Mars papiaredziła, što skarocić asartymient Orbit z-za prablem ź inhredyjentami i źmianieńniaŭ u łancužku pastavak. U sietcy kram «Vierny» zajavili, što, pa słovach pradstaŭnikoŭ Mars, kampanija nie zmoža adhružać prykładna pałovu asartymientu Orbit da kanca lipienia, a inšuju pałovu — da kanca hoda. Pryčynaj nazvanaja adsutnaść asnoŭnaha inhredyjentu dla vyrabu žujki.
Krynica «Kommiersanta» u bujnoj kampanii pa vytvorčaści praduktaŭ raspavioŭ, što humavaja asnova dla žujki z sintetyčnych palimieraŭ trapiła pad sankcyi JeS, uviedzienyja z-za ŭvarvańnia va Ukrainu. Pradukt pastaŭlajecca pad mytnym kodam u ramkach hrupy «chimičnyja pradukty… u tym liku składajucca z sumiesiaŭ naturalnych praduktaŭ…», jakaja ŭklučanaja ŭ pieralik zabaronienych da ŭvozu ŭ Rasiju.
Saŭładalnik Maskoŭskaj kandytarskaj fabryki «Pieramoha» Vital Muraŭjoŭ zajaviŭ, što znajści zamienu niedastupnym inhredyjentaŭ možna, naprykład, u Kitai, ale pastaŭki adtul zajmajuć značna bolš času.
Mars — amierykanski vytvorca charčovych praduktaŭ, jaki vałodaje, u liku inšaha, brendami Mars, Snickers, Milky Way, Bounty, M&M's. Da pačatku vajny pradukcyja Mars i impartavałasia ŭ Rasiju, i vypuskałasia na niekalkich miascovych zavodach.
U Biełaruś hetyja pradukty pastaŭlajucca ŭ asnoŭnym z rasijskich zavodaŭ.