«Ад яго ідзе моцны пах ацэтону». Мікалай Аўтуховіч трымае сухую галадоўку дзясяты дзень
Нягледзячы на гэта, яго прыводзяць на судовыя пасяджэнні.
20.07.2022 / 14:16
БелТА
Як стала вядома «Свабодзе», Аўтуховіча, якога кінулі ў карцар на тыдзень, працягваюць прыводзіць на судовыя пасяджэнні, што адбываюцца ў будынку гродзенскай турмы. А ён працягвае слабець, але трымаецца досыць бадзёра і не скардзіцца на свой стан. На працэсе ён пры неабходнасці ўстае і гаворыць, але ціха. У турме вязня рэгулярна наведваюць дактары.
Раней паведамлялася, што Аўтуховіч моцна абязводжаны, у яго перасохлі вусны і язык, ад яго ідзе моцны пах ацэтону, які выдзяляецца пры галаданні. Блізкія просяць дасылаць Міколу негазаваную ваду, сокі, мёд у пластыкавых пакунках, каб ён у любы момант мог пачаць выхад з галадоўкі.
Вязень такім чынам пратэстуе супраць абмежавання яго ў ліставанні, яму перасталі даходзіць лісты нават ад старой маці.
Чалавек можа памерці без вады ўжо на трэці дзень, або ў яго арганізме могуць пачацца незваротныя змены.