U Japonii pradali adnu višańku za 300 dalaraŭ. Jak takoje mahčyma?
Na aŭkcyjonie ŭ Japonii pradali adnu jahadu višni za 300 dalaraŭ u ekvivalencie. Hety dziŭny vypadak znoŭ pacviardžaje status Japonii jak krainy, dzie aburalna zavyšajuć ceny na sadavinu.
28.06.2022 / 19:33
Fota: AVALON.RED
U horadzie Chacinoche, što na poŭnačy Japonii, niadaŭna pradali karobku z 15 jahadami višni za 600 tysiač ijen (krychu bolš za 4400 dalaraŭ). Košt adnoj jahady, takim čynam, skłaŭ amal 300 dalaraŭ, piša The Times.
Kaštoŭnyja višni naležać da sortu Juno Heart i da typu Aomori Heartbeat. Takija jahady nadzvyčajna sałodkija, a ich šyrynia składaje nie mienš za 3,1 santymietra.
Jahady kupiŭ handlar sadaviny z prefiektury Ciba kala Tokia, jaki ŭ minułym hodzie zapłaciŭ za anałahičny nabor kala 3300 dalaraŭ. Letam u japonskaj biznes-sfiery pryniata abmieńvacca padarunkami (napoi, sałodkaje, sadavina), i čym daražejšy padarunak, tym lepš. Čakajecca, što višni mohuć nabyć dla hetaj mety.
Inšyja z takich kaštoŭnych padarunkaŭ — kubavidnyja kavuny ź japonskaj prefiektury Kahava, kožny ź jakich kaštuje nie mienš za 70 dalaraŭ. Kab kavuny atrymali naležnuju formu, ich vyroščvajuć u skryniach i źbirajuć, kali kavuny jašče niedaśpieli. Niahledziačy na vysoki košt, hetyja kavuny nieprydatnyja dla ježy, i čaściej za ŭsio ich vykarystoŭvajuć jak upryhažeńnie.
Ale ž sapraŭdny karol siarod darahoj japonskaj sadaviny — heta dynia jubary z paŭnočnaha vostrava Chakajda. Zvyčajna ich pradajuć pa canie kala 60 dalaraŭ za dźvie dyni, ale ŭ pačatku hoda ceny ŭźlatajuć. Na pieršym aŭkcyjonie hoda ŭdzielniki tarhoŭ płaciać tak zvanyja «vinšavalnyja ceny», jakija nibyta pavinny prynieści im udaču, a zaadno i biaspłatna prarekłamiravać firmu, jakaja zapłacić bolš za astatnija.
Što da dyń jubary, to samyja vysokija ceny na ich zafiksavali ŭ 2019 hodzie. Tady za dźvie dyni pakupnik addaŭ bolš čym 36,5 tysiač dalaraŭ.