Kiraŭnik Jeŭrakamisii: Ukrainie treba budzie jašče šmat zrabić, kab adpaviadać kryteryjam ES
Siońnia Jeŭrakamisija abmiarkuje status Ukrainy, Hruzii i Małdovy ŭ jakaści kandydataŭ u ES
13.06.2022 / 07:18
Fota: AP
U paniadziełak Jeŭrakamisija maje namier abmierkavać nadańnie statusu kandydata na ŭstupleńnie ŭ Jeŭrasajuz Ukrainie, a taksama Hruzii i Małdovie.
Jak zajaviła na sumiesnaj z prezidentam Uładzimiram Zialenskim pres-kanfierencyi ŭ Kijevie kiraŭnik Jeŭrakamisii Ursuła fon der Lajen, samo rašeńnie pa zajaŭcy Kijeva budzie pryniataje nie paźniej za kaniec hetaha tydnia.
Zrešty, navat u vypadku stanoŭčaha vyrašeńnia pytańnia heta stanie tolki pieršym krokam u vielmi praciahłym pracesie.
Spačatku ŭsie 27 krain — členaŭ ES pavinny dać svaju zhodu na nadańnie Ukrainie statusu kandydata na ŭstupleńnie ŭ Jeŭrasajuz, paśla čaho pačnucca hruntoŭnyja pieramovy pa reformach, jakija Kijeŭ abaviazany budzie ažyćciavić, kab adpaviadać usim kryteryjam člena ES.
Pry hetym fon der Lajen, jakaja ŭžo druhi raz z pačatku vajny pryjazdžaje ŭ stalicu Ukrainy, nie praminuła nahadać Uładzimiru Zialenskamu, što niahledziačy na paśpiachovy chod administracyjnych i inšych reformaŭ, treba budzie jašče vielmi mnohaje zrabić.
«Choć vy mnohaje zrabili dla ŭmacavańnia zakonnaści, nieabchodnyja i inšyja reformy, da prykładu, dla baraćby z karupcyjaj», — padkreśliła kiraŭnik Jeŭrakamisii.
Uładzimir Zialenski, u svaju čarhu, skarystaŭsia sumiesnaj pres-kanfierencyjaj, kab lišni raz nahadać, što «cellu Rasii źjaŭlajecca ŭsia Jeŭropa, i Ukraina — heta tolki pieršaja stadyja hetaj ahresii».
«Voś čamu stanoŭčy adkaz ES na zajaŭku Ukrainy ab ustupleńni ŭ ES moh by stać i stanoŭčym adkazam na pytańnie, ci jość budučynia ŭ jeŭrapiejskaha prajekta», — adznačyŭ prezident Ukrainy.