Kiraŭnik biełaruskaha vajenprama: Raspracoŭka rakiet — adna z klučavych zadač, chutka budzie całkam biełaruski ZRK
Kiraŭnik Dziaržkamvajenprama Dźmitryj Pantus ŭ efiry «Biełaruś 1» raskazaŭ pra pośpiechi ajčynnaj vajennaj pramysłovaści i ŭpłyŭ na hety praces sankcyj, piša reform.by. Pa jaho słovach, uviedzienyja zachodnimi krainami abmiežavańni «nadali dadatkovy impuls dla raźvićcia».
14.05.2022 / 20:48
Pavodle čynoŭnika, Biełaruś zajmajecca raspracoŭkaj roznych typaŭ uzbrajeńnia, u tym liku ŭłasnych rakiet dla ZRK «Buk» i sistemy «Pałanez», a taksama niekalkich bieśpiłotnych latalnych aparataŭ. Pa słovach Dźmitryja Pantusa, častka biełaruskich bieśpiłotnych latalnych aparataŭ užo pastaŭlenaja na ŭzbrajeńnie ŭ vojska.
U pryvatnaści, u 2021 hodzie byli zavieršanyja vyprabavańni dvuch bieśpiłotnikaŭ kvadrakoptarnaha typu, raspracoŭvajecca niekalki madyfikacyj bieśpiłotnika «Hryf 100», zaviaršajecca raspracoŭka bieśpiłotnika «Kamikadze». U 2022 hodzie jon projdzie ŭsie vyprabavańni i budzie pastaŭleny na ŭzbrajeńnie.
Havoračy pra raspracoŭku rakiet dla ZRK «Buk», Dźmitryj Pantus adznačyŭ, što rakiety ŭžo prachodziać vyprabavańni. Pavodle jaho słoŭ, było zroblena ŭžo 12 puskaŭ, i ŭsie jany prajšli paśpiachova.
U žniŭni 2022 hoda zapłanavany čarhovy etap vyprabavańniaŭ, a da asieńnie-zimovaha pieryjadu 2022-2023 hoda Dziaržkamvajenpram raźličvaje vyjści na dziaržaŭnyja vyprabavańni ŭ cełym całkam biełaruskaha zienitna-rakietnaha kompleksu.
Dźmitryj Pantus raskazaŭ, što raspracoŭka rakiet dla sistemy «Pałanez» praciahvajecca ŭžo try hady, i ŭdakładniŭ: na terytoryi Biełarusi niama mahčymaści pravodzić uvieś kompleks vyprabavańniaŭ, i mienavita z hetym źviazanyja takija terminy raspracoŭki. Čarhovy etap vyprabavańniaŭ, pa jaho słovach, zapłanavany na kaniec viasny i pačatak leta.
«Čarhovy etap vyprabavańniaŭ my ŭ kancy maja — pačatku červienia budziem pravodzić i pastupova budziem vychodzić na tyja zadačy, jakija stajać pierad nami — stvareńnie całkam biełaruskaha vyrabu», — zajaviŭ Pantus.
Pantus nazvaŭ rakietabudavańnie adnoj z klučavych zadač Dziaržkamvajenprama i adznačyŭ, što Biełaruś viadzie padrychtoŭku śpiecyjalistaŭ pa hetym kirunku.
«My navučajem śpiecyjalistaŭ pa hetym kirunku, u tym liku i ŭ Rasijskaj Fiederacyi. U 2022 hodzie čatyry śpiecyjalisty ŭžo viernucca paśla navučańnia i dapoŭniać škołu, jakaja ŭžo stvorana. Zadača darahaja, ale kali budzie vynik, možna budzie pradavać dadzienyja vyraby i na mižnarodny rynak», — raskazaŭ Dźmitryj Pantus.