U Baranavickim rajonie śpiłavali pałovu «altanki Mickieviča». Daviedalisia čamu
Turysty, jakija niadaŭna naviedvali Tuhanavicki park, što pablizu ahraharadka Karčova (Baranavicki rajon), zaŭvažyli, što nie stała častki «altanki Mickieviča». Tak nazyvali vysadžanyja kołam viekavyja lipy. Na miescy niekatorych dreŭ zastalisia tolki pni.
10.05.2022 / 13:25
Tak vyhladali drevy raniej
A voś ciapierašni stan. Fota: th-kanał «Spadčyna»
Čytačka «Našaj Nivy» patelefanavała śpiecyjalistu pa achovie historyka-kulturnaj spadčyny Baranavickaha rajona, supracoŭnicy rajonnaha centra ramiostvaŭ Anastasii Stolar i spytała, čamu śpiłavali lipu.
«U minułym hodzie była bura, jakaja złamała pałovu dreva. Było pradpisańnie achovy pryrody ab tym, kab uvieś hety burałom prybrać. Jašče niekalki dreŭ źleva, kala ŭvachodu ŭ park, byli vykarčavanyja, jany taksama byli pavalenyja vietram. Z druhoj častkaj dreva ŭsio narmalna. Prosta tak nichto historyka-kulturnuju kaštoŭnaść piłavać nie budzie, — zapeŭniła śpiecyjalistka. — Adzinaje — tam nie vielmi dobra śpiłavali hetaje dreva, zastaŭsia pień. Ale ja hetym pytańniem zajmajusia».
Tuhanavicki park zakładzieny ŭ kancy XVIII stahoddzi. Heta kłasičny ŭzor piejzažnaj parkavaj architektury pieryjadu ramantyzmu. U XIX stahoddzi majontak naležaŭ Vieraščakam. Siudy pryjazdžaŭ haścić paet Adam Mickievič, kab pabačyć kachanuju Marylu Vieraščaku.