Галоўчанка: Санкцыі нам спрыяюць, асобныя прадпрыемствы працуюць лепш, чым да іх
Прэм'ер-міністр Раман Галоўчанка падчас учарашняй працоўнай паездкі ў Мёры заявіў, што дзяржава працягне падтрымліваць прадпрыемствы, якія трапілі пад санкцыі. Пры гэтым, паводле яго слоў, санкцыі маюць і пазітыўнае значэнне — некаторыя прадпрыемствы, якія пад іх трапілі, сталі працаваць лепш, чым у мінулым годзе.
01.05.2022 / 08:35
«Ёсць факты, і не адзінкавыя, калі санкцыйныя прадпрыемствы працуюць лепш, чым у мінулым годзе, за кошт большага попыту на сваю прадукцыю», — заявіў Галоўчанка.
Але пэўныя складанасці, паводле яго, ёсць таксама.
«Напрыклад, нам трэба поўнасцю пераарыентаваць маржынальную частку прадукцыі дрэваапрацоўкі, якая ішла на Еўрапейскі Саюз. Гэта не так проста зрабіць. Тым не менш, гэта вырашальная задача: ёсць іншыя рынкі, ёсць кітайскі, сярэднеазіяцкі рынак».
Галоўчанка заявіў, што фактычна штодня мае зносіны з кіраўнікамі прадпрыемстваў, дзяржава выкарыстоўвае ў дачыненні да іх розныя меры падтрымкі.
«Напрыклад, з самых апошніх рашэнняў — дзяржава растэрмінавала шэрагу прадпрыемстваў тэрміны выплаты дывідэндаў, якія яны плацяць са свайго прыбытку. Замест таго, каб заплаціць іх адразу, ім разбілі выплаты да канца года, каб знізіць аднамомантавую нагрузку і мінімізаваць касавыя разрывы», — расказаў кіраўнік урада.
І дадаў, што таксама распрацоўваюцца ды прапануюцца новыя меры для падтрымкі прадпрыемстваў ва ўмовах санкцый.