Śviatłana Cichanoŭskaja sustrełasia ŭ Miunchienie z dziaržsakratarom ZŠA Entani Blinkienam
Padčas sustrečy, jakaja adbyłasia 18 lutaha u kułuarach Miunchienskaj kanfierencyi pa biaśpiecy, Śviatłana Cichanoŭskaja z dziaržsakratarom ZŠA Entani Blinkienam abmierkavali mižnarodnuju reakcyju na dziejańni biełaruskaha režymu, paviedamlaje pres-słužba Cichanoŭskaj. Taksama Cichanoŭskaja abmierkavała biełaruskija prablemy z važnymi mižnarodnymi čynoŭnikami.
18.02.2022 / 21:57
Entani Blinkien i Śviatłana Cichanoŭskaja.
U razmovie z Blinkienam Cichanoŭskaja adznačyła, što situacyja z pravami čałavieka paharšajecca, represii ŭzmacniajucca, režym pačynaje handlavać biełaruskim suvierenitetam. Łukašenka straciŭ samastojnaść i hatovy viarnuć jadziernuju zbroju ŭ krainu.
A pakolki Biełaruś maje vyrašalnaje značeńnie dla biaśpieki ŭ Jeŭropie, to jana pavinna być u centry mižnarodnaj uvahi.
Taksama Cichanoŭskaja sustrełasia siońnia z kiraŭnicaj MVF Krystalinaj Hieorhijevaj. Padčas sustrečy abmiarkoŭvalisia pytańni vydzialeńnia miljarda dołaraŭ Biełarusi «dla baraćby z karanavirusam».
Śviatłana Cichanoŭskaja z Krystalinaj Hieorhijevaj.
Lidarka biełaruskaha demakratyčnaha ruchu adznačyła, što hetyja hrošy, chutčej za ŭsio, pojduć na represii, a nie na dapamohu ludziam, i zaklikała znajści sposab zabłakavać hetyja srodki. Jana padkreśliła, što nieabchodna pierakanacca, što ŭ budučyni režym u Biełarusi nie zmoža złoŭžyvać miechanizmami mižnarodnaj dapamohi.
Cichanoŭskaja atrymała ad Hieorhijevaj zapeŭnivańni, što MVF nie źbirajecca bolš vydzialać hrošy režymu. U adkaz jana adznačyła, što Biełaruś raźličvaje na dapamohu MVF — jak finansavuju, tak i ekśpiertnuju ŭ dačynieńni da reformaŭ — u novaj Biełarusi, paśla pieramienaŭ.
Jašče adna važnaja siońniašniaja sustreča Cichanoŭskaj — z prezidentam Mižnarodnaha kamiteta Čyrvonaha Kryža Pieteram Maŭreram, na jakoj padymalisia pytańni ŭdziełu biełaruskaj arhanizacyi Čyrvonaha Kryža ŭ falsifikacyi vybaraŭ i arhanizacyi prykryćcia dla refierendumu.