NATO pakul nie bačyć prykmiet advodu rasijskich vojskaŭ ad miežaŭ
Hienieralny sakratar NATO Jens Stołtenberh zajaviŭ, što aljans pakul nie bačyć prykmiet advodu rasijskich vojskaŭ ad miežaŭ Ukrainy, što śviedčyła b pra realny namier Maskvy źnizić napružanaść.
16.02.2022 / 14:44
Fota: Reuters.com
Raniej rasijskija ŭłady zajavili, što častka złučeńniaŭ viartajecca ŭ miescy svajoj pastajannaj dysłakacyi paśla vučeńniaŭ, jany taksama kazali pra namier praciahvać sproby ŭrehulavać svaje roznahałossi z Zachadam dypłamatyčnym šlacham, piša Bi-bi-si.
«My pačuli sihnały ad Maskvy pra hatoŭnaść praciahvać dypłamatyčnyja namahańni, ale pakul nie ŭbačyli jakoj-niebudź deeskałacyi na miescy padziej, — skazaŭ Stołtenbierh u sieradu pierad sustrečaj ź ministrami abarony aljansu. — Naadvarot, padobna na toje, što Rasija praciahvaje naroščvać svoj vajenny patencyjał».
U adkaz na hetyja słovy Stołtenbierha pres-sakratar prezidenta Rasii Dźmitryj Piaskoŭ skazaŭ: «Niejki, napeŭna, handykap prysutničaje ŭ sistemie acenki situacyi. Heta, napeŭna, nie daje mahčymaść pradstaŭnikam NATO cviaroza aceńvać situacyju».
Raniej Maskva abviaściła, što padraździaleńni Zachodniaj i Paŭdniovaj vajskovych akruhaŭ u aŭtorak pačali viartańnie ŭ svaje vajskovyja harnizony. Ministr Siarhiej Šajhu zajaviŭ, što astatnija vučeńni zavieršacca taksama chutka.
U liku inšaha, zhodna z zajavami ministerstva abarony, vajskoŭcy i technika viartajucca paśla vučeńniaŭ u Krymie.