Prezident CNN pakinuŭ pasadu z-za tajnaha ramana z kalehaj. Pryčym aboje raźviedzienyja
Prezident amierykanskaha navinnaha telekanała CNN Džef Cukier abviaściŭ pra adstaŭku z-za tajnaha ramana z adnoj z kaleh. Pra heta piša CNN sa spasyłkaj na zajavu samoha Cukiera.
03.02.2022 / 10:08
Fota: CNN
«Mianie spytali ab adnosinach pa ŭzajemnaj zhodzie z majoj najbližejšaj kalehaj, ź jakoj ja pracavaŭ bolš za 20 hadoŭ. Ja pryznaŭ, što za apošnija hady hetyja stasunki raźvivalisia. Ja pavinien byŭ raskryć, kali jany pačalisia, ale ja nie zrabiŭ hetaha. Ja ździejśniŭ pamyłku. U suviazi z hetym siońnia ja sychodžu ŭ adstaŭku», — skazana ŭ zajavie.
Cukier nie ŭdakładniŭ imia kalehi, ź jakoj u jaho pačaŭsia raman. Adnak CNN piša, što havorka idzie pra vice-prezidenta i dyrektara pa markietynhu kanała Elisan Hałast. Jana zastajecca pracavać na CNN. Hałast pacvierdziła raman z Cukieram, zajaviŭšy, što ich ramantyčnyja stasunki pačalisia ŭ pieryjad pandemii. Jana škaduje, što jany nie raspaviali pra raman «svoječasova», dadała Hałast.
Džef Cukier uznačaliŭ CNN u 2013 hodzie. Da hetaha 25 hadoŭ jon prapracavaŭ na telekanale NBC. Cukier ličycca adnym z samych upłyvovych ludziej u amierykanskaj televizijnaj industryi.
Hałast pracavała na NBC razam z Cukieram i stała adnoj ź pieršych, kaho jon naniaŭ, kali pierajšoŭ na CNN.
I Cukier, i Hałast nie znachodziacca ŭ šlubie, abodva raźviedzienyja.