Rasijskaja Duma budzie razhladać pytańnie ab pryznańni DNR i ŁNR
Na nastupnym tydni ŭ Dziarždumie projduć kansultacyi z kiraŭnikami frakcyj pa prajekcie KPRF ab zvarocie da Uładzimira Pucina ab pryznańni niezaležnaści sieparatysckich respublik na ŭschodzie Ukrainy. Potym dakumient razhledzić Saviet Dumy. Pra heta paviedamiŭ u svaim telehram-kanale staršynia Dziarždumy Viačasłaŭ Vałodzin.
21.01.2022 / 20:30
Pavodle słoŭ śpikiera Dziarždumy, «my bačym ihnaravańnie Minskich pahadnieńniaŭ prezidentam Zialenskim. NATA choča akupavać Ukrainu. I adno, i druhoje moža abiarnucca trahiedyjaj. My nie pavinny hetaha dapuścić». A tamu, maŭlaŭ, treba šukać sposab abaranić suajčyńnikaŭ u samaabvieščanych ŁNR i DNR.
U sieradu deputaty z frakcyi KPRF unieśli ŭ Dziarždumu prajekt pastanovy, u jakim prapanujuć aficyjna źviarnucca da Pucina z prośbaj pryznać niezaležnaść ŁNR i DNR.
U Rasii, jak i ŭ Biełarusi, zakanadaŭčaja ŭłada kantralujecca vykanaŭčaj, tamu samo pa sabie toje, što adbyvajecca ŭ Dumie, nie maje vyrašalnaha značeńnia. Jakoje b rašeńnie ni pryniaŭ parłamient, vyrašać budzie Pucin i jaho atačeńnie.
Ale pakolki zvarot da Pucina zrobleny na fonie biesprecedentnaha abvastreńnia situacyi na miažy Rasii i Ukrainy, to vyklučać taho, što ŭ peŭnaj situacyi rasijskaje kiraŭnictva moža na heta pajści, nie vypadaje. Precedenty ŭ raniejšaj historyi ŭžo byli.