«Nie mahu pavieryć. Ja try razy pryščepleny». Lech Vałensa zachvareŭ na karanavirus
Pra svaju chvarobu lehienda polskaha antykamunistyčnaha supracivu, łaŭreat Nobieleŭskaj premii miru i były prezident Polščy Lech Vałensa paviedamiŭ u emacyjnym dopisie ŭ Fejsbuku.
21.01.2022 / 18:49
Lech Vałensa. Fota Roland Weihrauch / PAP
Vałensa napisaŭ:
«Nie mahu pavieryć.
Ja 3 razy pryščepleny, u mianie ŭziatyja 3 mazki. Ale ja infikavany.
Balić hałava. Nie mahu sahrecca. Adčuvaju, što cieła adryvajecca ad kaściej. Nie mahu dać rady ŭłasnamu ciełu. Što ž zrobiš? Paśla hetaha ŭroku nie budu rasstavacca z maskaj».
Pierad tym, jak stać na čale prafsajuza «Salidarnaść», Lech Vałensa byŭ elektrykam Hdańskaj sudnavierfi. U 1983 hodzie atrymaŭ Nobieleŭskuju premiju miru, a ŭ 1990 hodzie staŭ pieršym prezidentam Polščy, prabyŭšy na hetaj pasadzie piać hadoŭ. «Salidarnaść» daviała da źviaržeńnia kamunistyčnaha režymu ŭ Polščy, tamu rabočych Hdańskaj sudnavierfi praz 40 hadoŭ pamiatajuć i šanujuć va ŭsim śviecie jak hierojaŭ. Paśla Lecha Vałensy ŭ Respublicy Polšča zamianilisia čatyry prezidenty.
Ciapier Lechu Vałensu 78 hadoŭ. Jon daŭno na piensii, ale ŭdziełu ŭ hramadska-palityčnym žyćci nie kidaje, časta kamientuje biahučyja padziei ŭ Polščy i śviecie, u tym liku i ŭ Biełarusi. Choć peŭny ŭdar pa jahonaj reputacyi nanieśli dakazanyja fakty supracoŭnictva z polskimi kamunistyčnymi śpiecsłužbami ŭ pačatku 1970-ch hadoŭ, jašče da «Salidarnaści».