Калючым дротам абцягнуць плот вакол Следчага камітэта ў цэнтры Мінска
Цэнтральны апарат Следчага камітэта абвесціў пра закупку агароджы бяспекі — спіральны бар’ер, так называюць калючы дрот, які не дазваляе пераскочыць цераз плот. Гаворка ідзе пра будынак па вуліцы Фрунзэ, у цэнтры Мінска, праз дарогу — парк Горкага.
10.01.2022 / 21:51
Будынак цэнтральнага апарата СК. Фота: Сяргея Плыткевіча, «Планета Беларусь»
На закупку бар’ера з бюджэта гатовыя выдзеліць 7 тысяч рублёў. Уваход у Следчы камітэт і так быў абмежаваным. Трэба было падыйсці да металічнага плоту, пазваніць па дамафоне дзяжурнаму і назваць мэту візіта. Далей на ўваходзе чакае праверка дакументаў і дадатковы агляд рэчаў. Напрыклад, праносіць мабільныя тэлефоны наведнікам забаронена, іх пакідаюць на ўваходзе.
Цяпер ахову будынку вырашылі яшчэ ўзмацніць. Пасля выбараў-2020 сілавікі заяўлялі, што было некалькі спробаў нападзення на адміністратыўныя будынкі, праўда, пра будынкі Следчага камітэта тады гаворка не ішла.