Prezident Litvy prapanuje admianić nadzvyčajnaje stanovišča na miažy ź Biełarussiu
Prezident Litvy Hitanas Naŭsieda prapanuje admianić uviedzienaje z-za mihracyjnaha kryzisu na miažy ź Biełarussiu nadzvyčajnaje stanovišča, piša Delfi.
04.01.2022 / 12:24
Fota Delfi, Josvydas Elinskas
«Ja miarkuju, što ŭ takoj situacyi, jakaja skłałasia ciapier, było b metazhodna abmiarkoŭvać admienu nadzvyčajnaha stanovišča, bo heta mocny instrumient, jaki my pavinny vykarystoŭvać u asablivych abstavinach», — ranicaj u aŭtorak skazaŭ Naŭsieda ŭ intervju radyjostancyi Ziniu radijas. Jon taksama zajaviŭ, što «prablema ź mihrantami ciapier užo vyrašanaja», a pry ŭskładnieńni situacyi nadzvyčajnaje stanovišča možna ŭvieści znoŭ.
«Ciapier my možam admianić hetaje stanovišča i pačać pracu pa źmienie Kanstytucyi, pakolki ŭ padviešanym stanoviščy pytańnie ab pramych vybarach meraŭ, i my vinnyja našamu hramadstvu i samakiravańniam vyrašeńnie hetaha pytańnia, i jano pavinna być vyrašanaje jak maha chutčej», — padkreśliŭ kiraŭnik krainy.
Z-za nadzvyčajnaha stanovišča na miažy ź Biełarussiu ŭ Siejmie zatrymlivajucca papraŭki da Kanstytucyi ab pramych vybarach meraŭ. Zhodna z Kanstytucyjaj Litvy, padčas nadzvyčajnaha stanovišča abo ŭ vajenny čas papraŭki ŭ Kanstytucyju ŭnosicca nie mohuć. Kanstytucyjny sud Litvy ŭ krasaviku abviaściŭ, što pramyja vybary meraŭ niemahčymyja biez papravak da Kanstytucyi. Hetaja pastanova nabudzie moc 3 maja 2023 hoda, kali zavieršacca terminy paŭnamoctvaŭ abranych meraŭ.
Palityki chočuć jak maha chutčej pryniać papraŭki ŭ Kanstytucyju, kab zatym možna było mianiać zakony.
Nadzvyčajnaje stanovišča na miažy ź Biełarussiu było ŭviedzienaje 10 listapada i paźniej padoŭžanaje da 14 studzienia. Nielehalna pierajšli miažu Litvy ź Biełarussiu sioleta zvyš 4,2 tysiačy mihrantaŭ, bolšaść ź ich — irakcy.
Taksama z patokami nielehalnaj mihracyi sutykajucca Polšča i Łatvija. Słužbovyja asoby Litvy nazyvajuć heta hibrydnaj ahresijaj biełaruskaha režymu. Z-za hetych padziej u krainie abjaŭlenaja ekstremalnaja situacyja.