«Maci 75 hod, vakcynavałasia, lohka pieraniesła, a ja nie paśpieŭ». Biełarusy, što ciapier lečacca ad «karony», pra situacyju ŭ balnicach
Kolkaść nanoŭ zachvarełych na karanavirus rekordnaja navat pa aficyjnych danych. Usio bolš i bolš miedycynskich ustanoŭ stanoviacca «kavidnymi». A što kažuć pacyjenty? Pahavaryli z tymi, chto trapiŭ u balnicu, — pra lačeńnie, umovy ŭ pałacie i kolkaść vakcynavanych navokał.
22.09.2021 / 08:27
«Vypivaju try litry vady, jašče dva litry rastvoru ŭlivajuć praz kropielnicu»
Z karanavirusam u 1-j staličnaj balnicy tydzień lažyć Anatol Šumčanka, staršynia abjadnańnia «Pierśpiektyva». U jaho zachvareła ŭsia siamja.
Pakul pradprymalnik byŭ doma, kaža, surjoznaha lačeńnia nie prapisali.
«Aśpiryn, vitamin S, D, cynk, šmat vady. I malicca… U mianie pieršyja čatyry dni tempieratura źbivałasia, paśla nie».
Anatol vyklikaŭ chutkuju. Špitalizavali jaho ź pnieŭmanijaj i 25% paražeńnia lohkich.
«Usio, što mohuć zrabić daktary — pastavić kropielnicy rastvoru, kab razbavić kavidnuju kroŭ, zrabić ukoł hieparynu ŭ žyvot suprać trambozu, źbić tempieraturu, kali mahčyma, dać kisłarod i padniać saturacyju,
— apisvaje pradprymalnik balničnyja pracedury. — Usio astatniaje zaležyć ad vašaha arhanizmu.
U dzień vypivaju try litry vady, plus rastvoru kropielnicy ŭlivać 2,4 litra. Pić treba šmat. Tualet — moj druhi dom (uśmichajecca).
Kavarny kavid intelektualny i moža padładžvacca pad žarapanižalnyja. Pieršy raz tempieraturu sabješ — a paśla leki nie dziejničajuć. U mianie ŭ adzin ź dzion tradycyjnaja trajčatka i paracetamoł u kropielcy nie spracavali. Da viečara tempieratura padniałasia da 39,1. Daviałosia kałoć harmon».
Šumčanka zaŭvažaje, što ad pastajannych kropielnic bačnyja vieny ŭ jaho zastalisia tolki na kiści.
Śniadanak (źleva) i viačera ŭ balnicy
Niadaŭna Anatol adčuŭ siabie horš.
«Saturacyja nizkaja — 88-90, pad kisłarodam — 98. Tempieratury pakul niama, ale analizy na piku zapaleńnia. Kruhłasutkava pad maskaj».
U pałacie ź im jość vakcynavany mužčyna. Rabiŭ pryščepku «Sputnikam», ale kavid pieranosić składana — dychavica, chadzić ciažka, paražeńnie lohkich. Mahčyma, sprava ŭ novym štamie virusa.
«Pałaty boksavaha typu sa svaim dušam i tualetam»
Nastassia ź piatnicy lečycca ŭ minskaj infiekcyjnaj balnicy.
«Zachvareła ja 6 vieraśnia, 11-ha padniałasia tempieratura 38-39 hradusaŭ i tydzień trymałasia — źbivałasia tolki na paru hadzin. Byŭ nievynosny hałaŭny bol i mocny kašal z makrotaj, pachaŭ ja nie adčuvała.
17 vieraśnia paśla pryjomu žarapanižalnaha tempieratura pačała nie padać, a raści — pry 39,5 mnie stała vielmi drenna. Ja pabajałasia, što moža być pnieŭmanija, i vyklikała chutkuju. Pryjechali praz paŭtary hadziny i advieźli ŭ balnicu», — raskazvaje dziaŭčyna.
Tak vyhladaje balničny śniadanak…
…a tak — abied.
Praź niekalki dzion paśla špitalizacyi joj zrabili renthien — na zdymku lohkija byli čystyja.
Pałaty ŭ balnicy boksavaha typu, nievialikija, raźličanyja na adnaho-dvuch čałaviek. Jość svoj duš i tualet. «Vielmi prystojnaja pałata», — zaŭvažaje Nastassia.
Duš u pałacie
Lačeńnie, pa jaje słovach, va ŭsich amal adnolkavaje.
«Abaviazkova pić dva litry vady na dzień. Dajuć preparaty, kab makrota ŭ horle adychodziła, dla razredžvańnia kryvi. Taksama robim pałaskańnie nosu salavym rastvoram — dziakujučy jamu pachi viartajucca.
Jak kažuć daktary, usie miescy zaniaty. Lažać i darosłyja, i dzieci. Z pałaty vychodzić nielha, ale kali hladžu z akna ŭ inšyja karpusy, vizualna pałaty zapoŭnienyja».
Nastassia kavidam dahetul nie chvareła i pryščepku nie rabiła.
«Maci z kitajskaj vakcynaj lohka virus pieraniesła, a ja nie pryščapiŭsia»
Dva tydni tamu ŭ balnicu trapiŭ Alaksandr. Jon lečycca ŭ «dziasiatcy» ŭ Minsku. Spačatku mužčyna chadziŭ zdać mazok u palikliniku. Na nastupny dzień, kali karanavirus pacvierdziŭsia, vyklikaŭ chutkuju — tempieratura nie spadała, pachi źnikli, mocna baleła ŭ hrudziach.
«Tady krychu praściej situacyja była, tamu za mnoj chutka pryjechali. Advieźli ŭ balnicu i pakłali niedzie praz hadzinu».
Umovami ŭ addzialeńni Alaksandr ździŭleny: nie dumaŭ, što tak dobra.
«Tut ramont niekalki hod tamu byŭ. Ja lažu ŭ endakrynałohii — u mianie prosta spadarožnaje zachvorvańnie, cukroŭka. Pałata na šeść čałaviek, ciapier nas čacviora. Ale kažuć, balnicy zabita. Tut chirurhičnaje i aftalmałahičnaje addzialeńni zakryli pad karanavirus.
Z pałaty ŭ mascy možna vychodzić, ale pakidać addzialeńnie nielha. Duš jość na paviersie. Ježu pryvoziać z 11-j balnicy, bo tut na ramoncie stałovaja».
A voś batarei pakul nie hrejuć, u pałacie chaładnavata.
Kavidam 45-hadovy Alaksandr zachvareŭ upieršyniu. Aproč virusu ŭ jaho bakteryjalnaja infiekcyja — aciok lohkich (ci dvuchbakovaja pnieŭmanija).
«Doktar apieratyŭna reahuje. Analizy hladzić, kali što — na nastupny dzień mianiaje padychod. Mnie dajuć antybijotyki, kropielnicy staviać — fizrastvor, hlukozu (byvała pa try litry ŭ sutki ŭlivali).
Harmon kałoli, jaki virus błakuje. Prymaju taksama tabletki dla ačystki piečani, vitamin D. Leki koluć dla razredžvańnia kryvi. I vadu pjem pastajanna — kala troch litraŭ na dzień. Ja doma nie zmoh by taki režym vytrymać», — dzielicca mužčyna.
U pałacie ź im usie nievakcynavanyja. Sam jon pryščepku nie paśpieŭ zrabić
«Usio čakaŭ impartnuju — «Madernu», «Pfajzier». Ale nie dačakaŭsia. Budu napeŭna, kitajskuju, rabić. Bo maci sa mnoj ža zaraziłasia, jana vakcynavanaja kitajskaj, — dzion piać pachvareła, lohka pieraniesła i ŭžo na pracu vyjšła. Maci 75 hod.
Ale ź piersanału jość tyja, chto pryščepleny «Sputnikam» i ŭ balnicy lažyć. Jany ž u virusie pracujuć pastajanna, moža tamu tak».
Adzin z susiedaŭ Alaksandra lažaŭ u pałacie 17 dzion, siońnia vypisvajuć. Sam mužčyna, vierahodna, prabudzie ŭ balnicy da kanca tydnia.