Pamiatajecie palitviaźnia Baranoviča? Adbivaŭ anarchistaŭ ad cicharoŭ, adsiadzieŭ try hady ŭ kałonii, a ciapier bjecca ŭ kułačnych bajach na YouTube
Śviatasłaŭ Baranovič byŭ fihurantam palityčnych spraŭ až dvojčy. U 2011 hodzie jaho pryznavali palityčnym viaźniem. Tady Baranoviča, jašče 25-hadovaha junaka, sudzili za Płošču-2010, pakarali tryma hadami «chatniaj chimii». U sakaviku 2017 hoda paśla «Maršu niedarmajedaŭ» Baranovič u tralejbusie sprabavaŭ adbić anarchistaŭ ad cicharoŭ. Apošnija akazalisia supracoŭnikami milicyi. Praz paŭhoda Baranoviča złavili i prysudzili 3 hady kałonii (tady pravaabaroncy nie zachacieli pryznać jaho palitviaźniem). Śviatasłaŭ vyjšaŭ amal hod tamu, a ciapier byŭ zaŭvažany ŭ amatarskim turniry «Zames»: bai na hołych kułakach vykładvajuć na YouTube.
15.09.2021 / 08:28
Śviatasłaŭ Baranovič. Skrynšot ź videa jutub-kanała Zames
«Raniej ja zajmaŭsia boksam, kandydat u majstry sportu, navat mieŭ prapanovu jechać u Amieryku, byŭ hatovy kantrakt ad amierykanskaj pramoŭtarskaj kampanii dla mianie. Ale taja pasadka ŭ 2017 hodzie ŭsio sapsavała, — raskazaŭ Śviatasłaŭ «Našaj Nivie». — U hetyja bai ja trapiŭ praź siabra. Jon prapanoŭvaŭ, ja doŭhi čas admaŭlaŭsia — kułačnyja bai mnie nie vielmi cikavyja. Ale jon nastojvaŭ: davaj, davaj, bolš šancaŭ nie budzie. Nu, kažu ładna, pajšli pahladzim».
«Heta chutčej jak chobi, ja hetym nie zarablaju»
Pieršy boj Baranovič pravioŭ suprać majstra sportu Anatołija Martynienki. I paciarpieŭ parazu ŭ im.
«Z Martynienkam narmalny boj atrymaŭsia, dobry. Jon majstar sportu mižnarodnaha kłasa, vystupaŭ na Čempijanacie Jeŭropy. Mianie pastavili ź im bicca, ale ŭ tym bai ja faktyčna addaŭ jamu pieramohu. Moh by dabivać, ale paškadavaŭ. Za 100 dalaraŭ vybivać sabie ruki, i jaho paškadavaŭ — navošta čałavieka traŭmavać? Tamu ja spyniŭ boj, spasłaŭsia na stomlenaść.
Paśla ŭdzielničaŭ jašče ŭ adnym turniry — taksama prajhraŭ, mnie załamali nos. Supiernik byŭ słabiejšy. Kali ščyra, prosta časam nie raźličvaješ, dumaješ: «Aj, vyjdu na rassłabonie, ušataju». A atrymlivaješ siurpryz.
Doktar prapanoŭvaŭ paśla zrabić apieracyju na nos, a to, kaža, «horbik budzie». Ale mnie toje paralelna — va ŭsich baksioraŭ «horbik», tut ničoha strašnaha niama.
Heta chutčej jak chobi, ja hetym nie zarablaju. Tam za pieramohu płaciać 200 dalaraŭ, za parazu — 100. Tak što paru razoŭ vystupiŭ, a tam budzie bačna. Kali pa boksu buduć prapanovy — ja z radaściu, a kułačnyja bai — tolki za dobryja hrošy. Bo kali traŭma budzie, to elemientarnaja apieracyja i adnaŭleńnie paciahnie doraha.
Ale ja praciahvaju zajmacca sportam, voś zaraz idu jakraz na treniroŭku. Fizpadrychtoŭka ŭ mianie vydatnaja».
«Było soramna, što niama za što siadzieć»
Akramia trenirovak, Baranovič praciahvaje chadzić na zvyčajnuju štodzionnuju pracu.
«Pracuju na budoŭli. Tamu taksama nie chočacca «ŭchandochać» ruki ŭ bajach — kali nie vyjdu na pracu, to nie budzie čaho jeści banalna, — kaža Śviatasłaŭ. — Tamu treba bierahčy siabie i viedać, za što bješsia. Kab za bai prapanoŭvali adekvatnyja hrošy, to moža ja b i zaniaŭsia kankretna hetym. Tady nie nastolki choć škada było b zdaroŭja».
Paśla vychadu z kałonii Śviatasłaŭ žyvie ŭ Minsku. Kaža, hady pad vartaj prajšli niaprosta, ale škadavańniaŭ u jaho niama.
«Ja siadzieŭ u štrafnych izalatarach pastajanna, biez pasyłak, biez zvankoŭ, biez telehram. Mianie mučyli jašče da suda 8 miesiacaŭ, chacieli, kab vinu pryznaŭ. Pieraciskali ruki kajdankami, naprykład. Advakat taksama taki ž byŭ. Raiŭ: «Nu pryznajcie vinu, inakš jany nie supakojacca!» Ja pytaŭsia: «U čym vinavaty?»
Baranovič na sudzie ŭ 2018 hodzie. Fota Siarhieja Hudzilina
Paśla ŭ kałonii administracyja chacieła taksama, kab ja pryznaŭ vinu. Uvieś termin, ličy, trymali pa ŠIZA, ja vychodziŭ navat z adzinočki na volu. Listoŭ amal nie atrymlivaŭ i sam nie pisaŭ — akulary ŭ mianie zabrali. Navat majtki zabirali, bo ŭ bietonnaj kamiery ja ich padkładvaŭ pad hałavu. Tam ža choładna: udzień śpiš, unačy ruchaješsia.
Ale ja nie škaduju, što tady ŭviazaŭsia ŭ bojku. Adzinaje, što było soramna, što niama za što siadzieć».