Барэль: ЕС завяршае падрыхтоўку новых санкцый у дачыненні да Беларусі
Еўрапейскі Саюз завяршае падрыхтоўку пераліку асоб і ўстаноў, якія маюць дачыненне да прымусовай пасадкі ў аэрапорце Мінска самалёта Ryanair, на борце якога знаходзіўся Раман Пратасевіч. Пра гэта заявіў вярхоўны прадстаўнік ЕС па знешняй палітыцы і палітыцы бяспекі Жазеп Барэль.
08.06.2021 / 21:42
Адзначаецца, што санкцыі ў дачыненні да іх будуць ужытыя ў найбліжэйшыя дні.
«Разам з Еўракамісіяй мы пачалі падрыхтоўку эканамічных санкцый. Гэтыя санкцыі будуць прынятыя падчас наступнай сустрэчы Рады міністраў ЕС па замежных справах адносна крытычна важных сектараў беларускай эканомікі», — сказаў Барэль на пленарным пасяджэнні Еўрапарламента ў Страсбургу.
Ён нагадаў, што прымяненне такіх эканамічных санкцый адносіцца да кампетэнцыі краін-членаў, і выказаў надзею, што іх прадстаўнікі будуць адзінымі ў гэтым пытанні.
Барэль таксама адзначыў, што ЕС падрыхтаваў эканамічны пакет у памеры 3 мільярдаў еўра для падтрымкі дэмакратычнай Беларусі.