Кацярына Барысевіч: Гэта ненармальна, што журналісты з-за сваёй працы апынаюцца ў турме
Пра гэта журналістка Tut.by Кацярына Барысевіч заявіла падчас брыфінгу 21 мая.
21.05.2021 / 14:49
Фота Надзеі Бужан
Кацярына Барысевіч правяла паўгода за кратамі, яна была асуджана за выдаванне медыцынскай таямніцы (справа Рамана Бандарэнкі).
«Я ніколі не скажу «дзякуй за гэты вопыт» [зняволенне]. Я б нармальна жыла без гэтага. Мы радуемся, што чалавек выйшаў на волю. Але незразумела, чаму ён быў пазбаўлены волі? І я не магу радавацца, калі 15 маіх калегаў, столькі людзей несвабодныя», — сказала яна.
«Я б хацела развітацца з Валадаркай, але я разумею, што буду туды і лісты пісаць, і перадачы насіць. Гэта ненармальна, што журналісты з-за сваёй працы апынаюцца ў турме», — дадала Кацярына Барысевіч.