Перакладчыку з Магілёва далі сем сутак за рэпост з «экстрэмісцкага канала»
У Магілёве перакладчыка і актывіста Таварыства беларускай мовы Анатоля Прасаловіча асудзілі на 7 дзён адміністрацыйнага арышту за рэпост публікацыі з лагатыпам, які ўнесены ў спіс экстрэмісцкіх матэрыялаў. Ён пашырыў відэа пра выставу пратэставага мастацтва ў Токіа, паведамляе Радыё Свабода.
30.03.2021 / 14:16
Фота з сацсетак Анатоля Прасаловіча.
Справу разглядала суддзя Ленінскага раённага суда Таццяна Касцюк.
Анатоля Прасаловіча затрымалі 27 сакавіка ў цэнтры горада і да суда трымалі ў ізалятары. На працэсе стала вядома, што падставай для зняволення актывіста быў не рэпост забароненага відэа, а іншая адміністрацыйная справа, матэрыялы для якой нібыта збірае цяпер Ленінскі аддзел міліцыі.
Прасаловіч сказаў на судзе, што пашырыў відэаматэрыял, бо, як яму здалося, ён мог спадабацца знаёмцам з творчага асяроддзя. Паводле актывіста, забароненага лагатыпа на пачатку фільма не было, іначай ён не стаў бы яго перапошчваць, бо ведаў пра спіс экстрэмісцкіх матэрыялаў.