Talenavity raźbiar z Viciebska, asudžany na 2 hady za zamach dručkom na milicyjanta, praz mamu dziakuje za padtrymku i listy sa ŭsiaho śvietu
10.01.2021 / 13:40
9 studzienia maci viciebskaha mastaka Uładzisłava Makavieckaha, asudžanaha na dva hady źniavoleńnia za zamachvańnie dručkom na milicyjanta, damahłasia karotkaterminovaha spatkańnia z synam u SIZA №2 Viciebsku. Natałla Makavieckaja raskazała, što jaje syn nie padaje ducham i pieradaje vialikija padziaki tym, chto jaho padtrymlivaje.
«Jon trymajecca, jon bajec, jon maje ŭnutrany stryžań», — skazała paśla spatkańnia z synam maci Uładzisłava Natałla Makavieckaja.
Pa słovach spadaryni Natałli, Uładzisłava pryviali ŭ pakoj dla spatkańniaŭ u kajdankach, a potym prykuli da krataŭ kala akienca, chacia inšyja źniavolenyja prychodzili na spatkańnie biez naručnikaŭ. Čamu Uładzisłava dahetul trymajuć u kajdankach, dakładna nie viedaje. Sam Uładzisłaŭ patłumačyŭ, što jaho jašče raniej pastavili na śpieculik.
Uładzisłaŭ — talenavity raźbiar. Ź jašče dvuma majstrami z Bierazino jon azdobiŭ 23-mietrovuju łyžku z dubu.
Natałla Makavieckaja raskazała, što syn vyhladaje narmalna.
«Ale, vidać, pavietra ŭ kamiery nie staje, bačna, što kruhi pad vačyma. Kazaŭ, što viedaje pra śnieh na voli, bo pabačyŭ praz akno maleńki kavałačak nieba, ź jakoha śniežyła. Pryznaŭsia, što sa zdaroŭjem usio narmalna, ale ŭžo kolki dzion balić zub», — raskazała žančyna.
Uładzisłaŭ Makaviecki pieradaje praz maci vielizarnyja padziaki za listy, jakija atrymlivaje z voli. Kaža pra fantastyčnuju padtrymku.
«Heta tak kruta! Ja kali pra heta dumaju — prosta chočacca žyć!» — pieradaje słovy syna Natałla Makavieckaja. Listy atrymlivaje nie tolki z Biełarusi, ale i z Francyi, z Kanady, ZŠA i h.d. Prosić nie kryŭdzicca tym, kamu nie paśpieŭ adkazać. Šmat chto prosić u listach dasłać malunak, tamu źniavoleny mastak šmat maluje.
Pavodle maci, sustreča z synam u SIZA-2 ciahnułasia kala dvuch hadzin.
«Ja razmovu pieravodziła bolš na bytavyja temy, bo tam usio prasłuchoŭvajecca, ale jon pastajanna viartaŭ mianie da palityki. «Za mianie nie pieražyvaj. Ja vytrymaju! Ja spraŭlusia! I ŭ Biełarusi ŭsio budzie dobra!» — pieradaje słovy syna Natałla Makavieckaja.
Uładzisłaŭ sa svaim nastaŭnikam — viadomym raźbiarom Jaŭhienam Osipavym.
Jana paviedamiła taksama, što 28 śniežnia jaje syn padaŭ praz advakatku apielacyjnuju skarhu ŭ Viciebski abłasny sud na pastanovu suddzi Śniažany Kindziejevaj, jakaja 16 śniežnia pryznała jaho vinavatym u hvałcie da supracoŭnika ŭnutranych spraŭ (art. 364 KK) i prysudziła jamu dva hady pazbaŭleńnia voli ŭ kałonii ahulnaha režymu.
Natałla Makavieckaja vielmi spadziajecca, što jaje syn budzie pryznany pravaabaroncami palityčnym viaźniem. Uładzisłaŭ znachodzicca za kratami ad 18 vieraśnia.